Ka nisur tani marshimi nga Sheshin “Skënderbej” drejt Kryeministrisë, për ditën e 16-të të protestës kundër qeverisë.
Ashtu si në ditët e mëparshme, protestuesit do të ndalojnë para godinës së Kryeministrisë, ku do të mbahen fjalime nga organizatorët dhe pjesëmarrësit.
Pas përfundimit të fjalimeve, qytetarët pritet të vijojnë marshimin në disa prej rrugëve kryesore të kryeqytetit.
Gjatë fjalës së tyre me megafon, organizatorët u bënë thirrje protestuesve të ruajnë qetësinë dhe unitetin gjatë marshimit, duke theksuar se nuk duhet të përsëriten incidentet e regjistruara një natë më parë.
“Marshimi është organizuar nga vetë të rinjtë, por nga sot do të kujdesemi më shumë për mbarëvajtjen e tij, në mënyrë që të shmangen incidentet e mbrëmshme. Nuk do të ketë më marshim jashtë Unazës”, deklaroi aktivisti Kola.
Ndërkohë, një tjetër organizator siguroi pjesëmarrësit se ngjarjet e një nate më parë nuk do të përsëriten.
“Ajo që ndodhi mbrëmë nuk do të përsëritet”, u shpreh ai.
Kujtojmë që mbrëmë nga bulevardi “Dëshmorët e Kombit”, protestuesit nën brohoritma marshuan në autostradë dhe pasi mbërritën te mbikalimi i Kasharit u nisën në drejtim të rrugës që të çon në Rinas.
Dalja nga qyteti i Tiranës u bllokua, ndërsa i vetmi aks për të lëvizur ishte rruga dytësore. Edhe në aksin hyrës për në kryeqytet u krijua trafik kilometrik.
Policia ndërhyri duke u zënë pritë protestuesve dhe duke mos e lejuar marshimin deri në aeroport.
