Përqendrimi i tregut të telefonisë celulare në vetëm dy kompani nuk ka vonuar të sjellë faturën e hidhur për shqiptarët. Të dhënat zyrtare nga Autoriteti Kombëtar i Komunikimeve Elektronike tregojnë se shpenzimet mesatare që qytetarët shqiptarë bëjnë për telefoninë u rritën me shifrën rekord 42.1 për qind në harkun kohor të tre viteve duke e shtuar faturën vjetore me gati 30 euro për person.
ONE shkatërroi konkurrencën, tani shqiptarët po paguajnë
Të dhënat zyrtare tregojnë se shtrenjtimi i shërbimeve celulare erdhi pikërisht pasi One bleu kompaninë Albtelekom, një blerje e cila praktikisht shkatërroi konkurrencën në tregun e telefonisë celulare në vend. Tashmë vetë institucionet që e miratuan blerjen, pranojnë se duopoli po rrit çmimet me ritme të shpejta.
“Pas bashkimit të One me Albtelecom, tregu i shërbimeve celulare funksionon me dy operatorë, One Albania SHA dhe Vodafone Albania SHA, çka ka sjellë ndryshime edhe në strukturën e ofertave me pakicë. Gjatë kësaj periudhe (2023-2025) është konstatuar reduktim i numrit dhe larmisë së paketave tarifore, veçanërisht në segmentin me parapagesë, i shoqëruar me rritje të çmimeve të shumicës së paketave standarde dhe, në disa raste, me shtim të njësive të komunikimit,” konstaton Autoriteti i Komunikime Elektronike dhe Postare në një komunikim shkresor me Autoritetin e Konkurrencës.Gjithashtu, AKEP vëren se paketat me çmime më të ulëta (500–600 lekë) nuk ofrohen më në pikat fizike të shitjes, por vetëm nëpërmjet kanaleve digjitale të operatorëve, ndërsa paketat standarde me çmime 1,000– 1,100 lekë vijojnë të kenë përmbajtje të ulët interneti, duke orientuar konsumatorët drejt paketave me çmime më të larta.
Ndërkohë vetë Autoriteti i Konkurrencës pranon se tashmë dy kompanitë celulare kanë një koordinim të heshtur në rritjen e çmimeve.
“Gjatë periudhës hetimore 1 janar 2022 – 18 nëntor 2025, hetimi i thelluar evidentoi se Vodafone Albania SHA dhe One Albania SHA kanë ndjekur sjellje tregtare me karakteristika të ngjashme në lidhje me ofertat e shërbimeve celulare, përfshirë paketat me parapagesë, paketat me kontratë dhe shërbimet roaming. Nga analiza rezultoi se: çmimet e paketave kanë pësuar rritje progresive dhe të përafërta në kohë; ndryshimet janë aplikuar në kategori të njëjta ose të ngjashme shërbimesh; janë konstatuar nivele të larta ngjashmërie në strukturën dhe përmbajtjen e ofertave. Këto elemente janë evidentuar në mënyrë të përsëritur gjatë periudhës hetimore dhe reflektojnë një nivel të lartë ngjashmërie në sjelljen tregtare të ndërmarrjeve në tregun përkatës,” pranon Autoriteti i Konkurrencës.
Sipas AK, analiza kronologjike e ndryshimeve të çmimeve dhe strukturës së paketave tregon se, në disa raste, pas ndryshimeve të ndërmarra nga njëra ndërmarrje në lidhje me çmimet ose përmbajtjen e paketave, ndërmarrja tjetër ka reaguar brenda intervaleve të afërta kohore, duke aplikuar ndryshime të ngjashme në nivel çmimi dhe në strukturën e ofertës (minuta, internet, SMS, vlefshmëri, roaming etj.).Por Konkurrenca thotë se nuk mund të provojë dot marrëveshje për fiksim çmimesh.
“Gjatë hetimit nuk u administruan prova të drejtpërdrejta apo të tërthorta që të provojnë ekzistencën e kontakteve, komunikimeve, shkëmbimit të informacionit sensitiv tregtar apo të një mekanizmi koordinues ndërmjet ndërmarrjeve në lidhje me përcaktimin e çmimeve apo strategjive tregtare,” thotë Konkurrenca./ kapitali.al
