Kombet e Bashkuara në Shqipëri kanë reaguar lidhur me situatën e tensionuar gjatë protestave në Tiranë, duke dënuar aktet e dhunës dhe duke u bërë thirrje të gjitha palëve të shmangin përshkallëzimin e mëtejshëm të përplasjeve.
Në deklaratën e publikuar më 16 tetor, OKB-ja thekson rëndësinë e respektimit të të drejtave themelore të qytetarëve, mes të cilave e drejta për tubim paqësor, liria e shprehjes dhe liria e shtypit. Organizata nënvizon se siguria dhe dinjiteti i çdo personi duhet të garantohen, ndërsa duhet të respektohet dhe të mbrohet prona publike dhe private.
Një vëmendje e veçantë në deklaratë i kushtohet edhe rolit të forcave të rendit. Kombet e Bashkuara kërkojnë që policia të veprojë me vetëpërmbajtje dhe proporcionalitet, në përputhje me standardet ndërkombëtare për të drejtat e njeriut. Gjithashtu, theksohet nevoja për respektimin e garancive që lidhen me procesin e rregullt ligjor.
Në përfundim, OKB-ja u bën thirrje të gjitha palëve të përfshira të shmangin përdorimin e dhunës, të kontribuojnë në uljen e tensioneve dhe të zgjedhin dialogun konstruktiv si mënyrën më të përshtatshme për kapërcimin e situatës.
Deklarata e plotë e OKB-së në Shqipëri
“Kombet e Bashkuara në Shqipëri shprehin shqetësimin për aktet e fundit të dhunës dhe përshkallëzimin e tensioneve gjatë protestave në Tiranë. Rikonfirmojmë rëndësinë e respektimit dhe mbrojtjes së të drejtave themelore të tubimit paqësor, lirisë së shprehjes dhe lirisë së shtypit, si dhe të garantimit të sigurisë dhe dinjitetit të të gjithëve, në përputhje me parimet e Kartës së Kombeve të Bashkuara dhe standardet ndërkombëtare të të drejtave të njeriut.
Theksojmë rëndësinë e vetëpërmbajtjes dhe proporcionalitetit në veprimet e forcave të rendit, respektimit të garancive për një proces të rregullt ligjor dhe mbrojtjes së pronës publike dhe private, në përputhje me standardet ndërkombëtare të të drejtave të njeriut. U bëjmë thirrje të gjitha palëve të përfshira të përmbahen nga dhuna, të kontribuojnë në uljen e tensioneve dhe të angazhohen në një dialog konstruktiv, në frymën e respektit të ndërsjellë dhe të angazhimit të përbashkët për paqen dhe shtetin e së drejtës.”
