Prokuroria e Fierit ka përfunduar hetimet dhe ka dërguar në gjyq noteren Anila Haxhiu, e akuzuar për falsifikim dokumentesh gjatë ushtrimit të detyrës.
Sipas hetimeve, gjatë periudhës 2011–2020, Haxhiu dyshohet se ka hartuar dhe lëshuar akte noteriale, përfshirë kontrata për shitblerjen e automjeteve, duke përdorur emrat e noterëve të tjerë, pa qenë këta të fundit autorë të dokumenteve përkatëse.
Nga verifikimet ka rezultuar se, në disa raste, është përdorur edhe emri i një notereje me zyrë në Tiranë, ndërsa aktet dyshohet se janë hartuar në Fier nga e pandehura.
Hetimet kanë zbuluar gjithashtu se Haxhiu ka hartuar akte noteriale pa praninë e palëve. Ndërkohë, kontratat e shitblerjes së automjeteve të përgatitura gjatë viteve 2011–2018 nuk rezultonin të regjistruara në regjistrat përkatës noterialë të noterëve, emrat e të cilëve ishin përdorur në dokumente.
Për të njëjtën notere, në kuadër të procedimit penal nr. 390/2023, janë përfunduar hetimet dhe ajo është marrë e pandehur për veprën penale “Falsifikimi i dokumenteve” nga personi që ka për detyrë t’i lëshojë ato, e parashikuar nga neni 186, paragrafi i tretë, i Kodit Penal.
Tashmë çështja do të shqyrtohet nga gjykata, e cila do të vendosë mbi akuzat e ngritura ndaj saj.
