GJKKO ka vendosur të lërë në fuqi masën e sigurisë “arrest me burg” për Xhuljano Hoxhën, 31 vjeç, i cili u ekstradua një ditë më parë nga Britania e Madhe në Shqipëri. Ai akuzohet se ka qenë pjesë e grupit kriminal që merrej me kultivimin dhe përpunimin e kanabisit në Drenovicë të Beratit.
Hoxha u përball me gjykatën pas ekstradimit, por zgjodhi të mos flasë para gjyqtarit Bib Ndreca dhe prokurores Elida Kaçkini. Në seancë ai u përfaqësua nga avokati i caktuar kryesisht, Arben Peçi, i cili kërkoi zëvendësimin e masës së sigurisë me një masë më të butë. Kërkesa nuk u pranua nga gjykata.
31-vjeçari ishte arrestuar në Britani në tetor të vitit të kaluar, pasi ishte shpallur në kërkim nga autoritetet shqiptare. Ndaj tij, GJKKO kishte caktuar masën “arrest me burg” në muajin prill.
Emri i Hoxhës lidhet me operacionin antidrogë të zhvilluar në nëntor 2022 në Drenovicë, ku policia zbuloi një kompleks serrash ku kultivohej dhe përpunohej kanabis. Në total u sekuestruan rreth 870 kilogramë lëndë narkotike.
Operacioni në atë kohë tronditi edhe strukturat lokale të Policisë së Beratit. Në terren u shoqëruan 105 persona, mes tyre 95 gra që ishin punësuar për punët e pastrimit dhe përpunimit të kanabisit. Nga hetimet rezultoi se serat ishin në pronësi të Hamdi Dylit dhe kompleksi ishte ndarë në katër ambiente, me rreth dy dynym secili.
Pas operacionit, 11 persona u arrestuan, ndërsa hetimet u zgjeruan edhe brenda Policisë së Beratit. 57 efektivë, përfshirë drejtues të lartë të strukturave vendore, u vunë nën hetim për lidhjet e dyshuara me aktivitetin kriminal. Shtatë prej tyre u përjashtuan përfundimisht nga Policia e Shtetit.
Dosja u transferua nga Prokuroria e Beratit te SPAK, pasi organi i akuzës në Berat deklaroi moskompetencën. Sipas hetimeve, aktiviteti kriminal dyshohej se drejtohej nga dy grupe të strukturuara kriminale.
Për këtë dosje, GJKKO ka dhënë më herët dënime që në total arrijnë në 111 vite e 8 muaj burg për 17 persona. Mes të dënuarve janë edhe Sadetin Hasaj dhe Blerim Xheka, të konsideruar si drejtues të grupeve kriminale, të cilët janë dënuar me nga 8 vite e 8 muaj burgim.
Hoxha tashmë do të vijojë përballjen me drejtësinë në Shqipëri, ndërsa hetimet për rolin e tij në këtë aktivitet kriminal vijojnë.
