Një vrasës shqiptar, i dënuar me 32 vite burg në Britaninë e Madhe, ka shkaktuar polemika pasi ka postuar video në TikTok direkt nga qelia e tij, duke iu lutur autoriteteve të transferohet në një burg në Shqipëri, shkruan Daily Mail.
Eugert Merizaj, 32 vjeç, u dënua në maj 2022 për ekzekutimin me armë zjarri të tregtarit rival të drogës, Hemawand Ali Hussein.
Megjithëse përdorimi i telefonit celular pas hekurave është i paligjshëm, rojet e HMP Manchester duket se nuk kanë mundur ta ndalojnë, ndërsa ai ka publikuar dhe transmetuar “live” lojëra online që gjenerojnë para në dorë.
Në videon e fundit, Merizaj ankohet për ushqimin “e tmerrshëm” në burgun britanik dhe shprehet se dëshiron të shohë familjen. “I kam bërë të gjitha aplikimet. Ata prej nesh me dënime të përjetshme nuk po i lëvizin fare”, thotë ai.
Një marrëveshje transferimi mes Britanisë dhe Shqipërisë, që hyri në fuqi në maj 2023, parashikon që çdo shqiptar i dënuar me mbi katër vite burg në Mbretërinë e Bashkuar të mund të vuajë pjesën e mbetur të dënimit në vendlindje, me synim uljen e kostove për taksapaguesit britanikë.
Megjithatë, zbatimi i saj po ecën ngadalë. Sipas burimeve të Daily Mail, deri më tani vetëm 10 të burgosur shqiptarë janë transferuar në Shqipëri, pavarësisht dhjetëra kërkesave të bëra.
