Kryeministri izraelit Benjamin Netanyahu tha dje në mbrëmje se kërkon t’i japë fund luftës kundër organizatës islamiste palestineze “Hamas” në Rripin e Gazës sa më shpejt të jetë e mundur dhe beson se marrja e kontrollit të Qytetit të Gazës është mënyra më e shpejtë për ta arritur këtë.
Duke folur në një konferencë për shtyp, Netanyahu tha se kishte udhëzuar Forcat Mbrojtëse të Izraelit (IDF) të shkurtonin afatet kohore për marrjen e kontrollit të qytetit, metropolit më të madh në territorin palestinez të shkatërruar nga lufta.
“Po flasim për një afat kohor mjaft të shkurtër sepse duam ta çojmë luftën drejt fundit. Kështu e çojmë luftën drejt fundit”, u tha ai gazetarëve në një konferencë tjetër për shtyp.
Kabineti Izraelit i Sigurisë nën drejtimin e kryeministrit Benjamin Netanyahu vendosi të premten që ushtria duhet të marrë kontrollin e Qytetit të Gazës.
Afati kohor për një operacion të tillë mbetet i paqartë, me mediat lokale që raportojnë se ushtrisë mund t’i duhen dy muaj për t’u përgatitur.
Zgjerimi i planifikuar do të kërkonte zhvendosjen e afërsisht 1 milion palestinezëve që ndodhen aktualisht në Qytetin e Gazës në pjesë të tjera të territorit, ku Izraeli do të duhej të ngrinte strehime, furnizime me ushqim dhe ujë, si dhe objekte mjekësore.
Pas 22 muajsh lufte, Rripi i Gazës është shkatërruar kryesisht.
Operacioni do të përfshinte gjithashtu thirrjen e qindra mijëra rezervistëve, riparimin dhe zëvendësimin e pajisjeve të konsumuara dhe dislokimin e tyre në pozicion.
“Shtabi i Përgjithshëm pritet të miratojë idetë themelore për operacionin deri në fund të javës”, raportoi portali i lajmeve “ynet”.
Sipas raportimeve të medias, shefi i Shtabit të Përgjithshëm Eyal Zamir ka shprehur skepticizëm në lidhje me planin.
