Gjykata e Kasacionit në Itali ka shpallur të papranueshme ankesën e një 36-vjeçari shqiptar, i cili kundërshtonte ekstradimin në Shqipëri me argumentin se rrezikonte jetën për shkak të një konflikti sipas Kanunit.
Sipas vendimit të marrë në fund të janarit, gjykata vlerëson se rreziku për t’u bërë subjekt i hakmarrjes apo i një grindjeje familjare nuk përbën pengesë ligjore për ekstradimin.
Mediat italiane bëjnë me dije se 36-vjeçari ishte shpallur në kërkim në vendin tonë për tentativë vrasjeje dhe armëmbajtje pa leje.
Ai u arrestua në rajonin e Piemontes, pasi u kap në Torino duke vjedhur dhe me një pasaportë të falsifikuar. Në Itali, ai është nën hetim për pranimin e mallrave të vjedhura dhe falsifikim dokumentesh.
Pas arrestimit, ai i kërkoi Gjykata e Apelit e Torinos lirimin nga burgu ose vendosjen në arrest shtëpiak, duke argumentuar se nuk kishte rrezik arratisjeje, pasi ishte larguar nga Shqipëria për shkak të kërcënimeve ndaj tij dhe familjes.
Avokati i tij pretendoi se klienti kishte qenë edhe viktimë e një tentative vrasjeje në Shqipëri, në kuadër të një konflikti të lidhur me Kanunin.
Sipas mediave italiane, gjykata e pranoi se ekzistonte dokumentacion që provonte se ai kishte qenë objekt i një sulmi me armë zjarri, ndërsa autorët nuk janë identifikuar.
