Pas goditjeve të fundit të autoriteteve shqiptare ndaj industrisë së call center-ave mashtruese, tregu që dikur qarkullonte qindra miliona euro duket se nuk është zhdukur, por vetëm është riorganizuar. Burime pranë sektorit thanë se një pjesë e madhe e operatorëve të njohur janë larguar nga aktiviteti, disa janë nën hetim, ndërsa të tjerë kanë transferuar aktivitetet jashtë Shqipërisë. Megjithatë, në këtë vakuum kanë dalë në pah dy emra që konsiderohen tashmë si figurat më të forta të mbetura në këtë treg: Florian P. dhe Ermal P.
Dy vëllezërit, me profile krejt të ndryshme, kanë ndërtuar një rrjet të fuqishëm kompanish. Floriani, ish-efektiv policie sipas burimeve, njihet për lidhjet e tij me persona të botës së sigurisë dhe për mënyrën e organizimit strikt të strukturave operative. Ndërkohë Ermali, i cili në vitet e fundit është futur fuqishëm në sektorin e ndërtimit, konsiderohet si “truri financiar” i aktivitetit, duke investuar fitimet në pasuri të paluajtshme, lokale biznesi dhe kompani fasadë.
Pas operacionit të Prokurorisë së Tiranës dhe hetimeve të SPAK, shumë nga call center-at që operonin me skema mashtrimi financiare, investime false apo platforma online janë mbyllur ose kanë ulur aktivitetin. Por sipas informacioneve nga tregu, dy vëllezërit kanë arritur jo vetëm të mbijetojnë, por edhe të zgjerojnë ndikimin e tyre. Thuhet se aktualisht kontrollojnë një rrjet me mbi 700 punonjës, të shpërndarë në disa zyra në kryeqytet.
Skema e funksionimit mbetet e ngjashme me vitet e mëparshme. Të rinj të moshës 20–30 vjeç rekrutohen si operatorë telefonikë, trajnohen për komunikim në gjuhë të huaja dhe përdoren për të kontaktuar qytetarë europianë apo amerikanë me oferta investimesh të rreme. Pagesat, sipas hetimeve të mëhershme, kalojnë përmes kompanive offshore, kriptomonedhave apo llogarive bankare të ndërmjetme, duke e bërë të vështirë gjurmimin e parave.
Ndryshimi i kupolës së Policisë së Shtetit dhe presioni ndërkombëtar ndaj Shqipërisë kanë krijuar frikë te shumë operatorë të tregut. Megjithatë, burime jozyrtare thonë se Florian dhe Ermal P. kanë zgjedhur të qëndrojnë në Tiranë, duke besuar se rrjeti i tyre i kontakteve dhe fuqia financiare i mbron nga goditjet direkte.
Në qarqet ekonomike të Tiranës flitet gjithnjë e më shumë për investimet e fundit të dy vëllezërve në ndërtim, bare luksoze dhe pasuri të paluajtshme. Kjo ka ngritur dyshime se fitimet e gjeneruara nga call center-at po pastrohen përmes sektorëve të ligjshëm të ekonomisë. Deri më tani nuk ka një akuzë zyrtare publike ndaj tyre, por emrat e tyre po verifikohen.
Ndërkohë, ekspertët e sigurisë paralajmërojnë se edhe pse disa struktura janë goditur, industria e mashtrimit online nuk është zhdukur. Ajo po transformohet, po bëhet më e sofistikuar dhe po lidhet gjithnjë e më shumë me sektorë të tjerë ekonomikë. Dhe në qendër të këtij transformimi, sipas burimeve të tregut, qëndrojnë dy vëllezërit që sot konsiderohen si “bosët” e rinj të call center-ave në Tiranë./ZËRI
