Finalja e Superkupës së Shqipërisë nuk kaloi pa polemika për gjykimin, por edhe nervozizëm mes ekipeve për mungesë “fair play”, në një aksion që solli si për ironi të fatit edhe një penallti të dhënë me VAR për Egnatian. “Panorama Sport” ju sjell të gjitha rastet për moviolë në Partizani-Egnatia, e gjykuar nga Enea Jorgji, i cili vetëm tri ditë më parë u shpall më i miri i vitit në ceremoninë që organizoi FSHF-ja.
20’ Aksion i Egnatias nga krahu i majtë, aty ku Fernando në përpjekje për të dribluar Hadrojin, rrëzohet në zonë dhe kërkon penallti. Jorgji vijon lojën dhe pamjet filmike i japin të drejtë, pasi ndërhyrja e mbrojtësit të Partizanit ishte e rregullt. (VIDEO)
41’ Sherri e tepron me mbajtjen e topit dhe Bintsuka ia rrëmben, duke shërbyer te Taipi, që shënon me portën e boshatisur. Arbitri Jorgji anulon golin dhe akordon faull për portierin e Egnatias. Pamje filmike i japin të drejtë, pasi sulmuesi i Partizanit ka ndërhyrë në mënyrë të gabuar me këmbën e majtë ndaj Sherrit. (VIDEO)
67’ Keko i Partizanit dëmtohet në një duel me Xhemajlin në mesfushë, por Jorgji nuk akordon faull dhe Egnatia më pas vijon aksionin. Fernando driblon Carën dhe shërben te Zejnullai, i cili më pas e çon topin te Spahiu, që rrëzohet në duel me Hadrojin dhe kërkon penallti. Jorgji, edhe pse afër aksionit, vijon lojën.
Ka protesta nga lojtarët e Partizanit për mungesë “fair play” të kundërshtarit, pasi për një rast identik në minutën e 60-të, të kuqtë ndalën lojën, edhe pse kishin një kundërsulm premtues.
Pas katër minutash ndërprerje, Jorgji sinjalizohet nga VAR dhe shikon në monitor rastin e dyshimtë. Arbitri vendos të akordojë 11-metërsh për Egnatian. Pamjet i japin të drejtë, sepse Hadroj ka prekur këmbën e Spahiut, duke shkaktuar faull. (VIDEO)