Aktivisti Gent Progni ka reaguar sërish pas vendimit për heqjen e flamujve të Ushtrisë Çlirimtare të Kosovës gjatë ndeshjes Shqipëri–Serbi, duke e cilësuar veprimin si “një fshirje simbolike e historisë” në një kohë kur kujtesa kolektive është më e rrezikuar se kurrë.
Në një reagim të publikuar në rrjetet sociale, Progni shkruan se, ndryshe nga e kaluara kur një lajm zgjaste tre ditë dhe më pas harrohej, sot gjithçka mbetet përgjithmonë — “në servera, në cache, në screenshot.”
Ai thekson se ndërsa më parë gazetat përfundonin si leckë për të pastruar xhama, sot lajmet online shndërrohen në “mur turpi që nuk lahet dot, as me 100 konferenca shtypi.”
“Heqja e flamurit të UÇK-së nuk ishte një lajm i thjeshtë,” shkruan Progni, “Ishte një gjest i shëmtuar, një fshirje simbolike e historisë, në një stadium plot shqiptarë që e kanë luftuar atë flamur me gjak, jo me mouse.”
Postimi i plote
🟥 Cudia dikur zgjaste 3 ditë.
Sot zgjat përjetë… në servera, në cache, në screenshot.
Dikur lajmi shkruhej në gazetë, e pas tre ditësh përfundonte duke pastruar xhama. Sot lajmi shkruhet online dhe bëhet mur turpi që nuk lahet dot, as me 100 konferenca shtypi.
Heqja e flamujve të UÇK në ndeshjen Shqipëri–Serbi nuk ishte një lajm i thjeshtë. Ishte një gjest i shëmtuar, një fshirje simbolike e historisë, në një stadium plot shqiptarë që e kanë luftuar atë flamur me gjak, jo me mouse.
Dhe kur sistemi të heq flamurin nga tribuna, ne e vendosim në derën e zyrës. Sepse kush harron, lejon të përsëritet.
Sepse kush hesht, firmos.
Sepse kush nuk vepron, dorëzohet.
🇦🇱 Lavdi kujtesës që nuk fshihet me direktiva.
Lavdi atyre që nuk presin leje për të nderuar të vërtetën.
#MosEHiqHistorinë #UCK #JoHarrim #AtdheuNukRedaktohet
