Moderatori Syrjan Rahova ka njoftuar largimin nga drejtimi i emisionit “Mes’ditë”, duke i dhënë fund një eksperience që, sipas tij, ka qenë një ndërthurje sfidash, surprizash dhe suksesi.
Përmes një postimi në rrjetet sociale, Rahova ka zgjedhur ta ndajë vetë me publikun vendimin, duke theksuar se tashmë do të fokusohet në projekte të reja.
Ai ka falënderuar shikuesit për mbështetjen dhe përzemërsinë e treguar gjatë kohës që ishte në ekran, ndërsa është shprehur se largohet me kënaqësinë që ka dhënë maksimumin e tij çdo ditë.
“Zyrtarisht ju them që NUK do të jem më në drejtimin e emisionit ‘Mes’ditë’. Ka qenë një rrugëtim i mrekullueshëm, sfidues, surprizues por jashtëzakonisht i suksesshëm. Tani është momenti për t’u përqendruar në projekte të reja.”
Rahova e ka mbyllur mesazhin duke lënë të hapur rikthimin e tij në ekran, duke shkruar se “drita e kuqe do ndizet” dhe se do të shihet sërish shumë shpejt.
Njoftimi i moderatorit
Miqtë e mi, dua t’jua them vetë një lajm të rëndësishëm për mua.
Zyrtarisht ju them që NUK do të jem më në drejtimin e emisionit “Mes’ditë”. Ka qenë një rrugëtim i mrekullueshëm, sfidues, surprizues por jashtëzakonisht i suksesshëm. Tani është momenti për t’u përqendruar në projekte të reja.
Largohem me kokën lart dhe me kënaqësinë e madhe që ju dhashë më të mirën time çdo ditë. Ju falënderoj nga zemra për gjithë mbështetjen, dashurinë dhe mikpritjen që na keni dhënë në shtëpitë tuaja.
Drita e kuqe do ndizet e ne do të shihemi shumë shpejt sërish!
Me përulësi SYRI!
