Pas një serie të gjatë kundërshtimesh dhe zvarritjesh që zgjatën për muaj me radhë, Komisioni i Prokurimit Publik i ka dhënë fund ciklit të ankimimeve për tenderin rreth 7.7 milionë euro të sistemit të tatimeve për faturimin, duke rrëzuar sërish kërkesat e paraqitura dhe duke i hapur rrugë vijimit të procedurës.
Tenderi me objekt “Mirëmbajtje e Modulit të Menaxhimit të Kontrollit të Faturimit për Drejtorinë e Përgjithshme të Tatimeve”, me fond limit rreth 7.7 milionë euro, është një nga procedurat më të zvarritura të viteve të fundit në KPP, pasi është shoqëruar me ankesa të njëpasnjëshme në çdo fazë.
Më herët, i njëjti tender ishte ankimuar për disa muaj edhe nga kompania CSP, e cila kërkoi ndryshime dhe sqarime në dokumentet e procedurës. Pas shqyrtimit, Komisioni kishte detyruar autoritetin kontraktor të reflektonte kërkesat dhe të përditësonte dokumentet standarde, çka e shtyu më tej procesin, i cili po bën gati 1 vit që prej shpalljes së parë.
Më 25 shkurt, KPP vendosi të mos pranojë sërish ankimimet e paraqitura, kësaj radhe nge kompania DataLog e Sokol Sinanit, duke theksuar se në fazat e mëparshme janë bërë të gjitha rishikimet e nevojshme dhe se dokumentet e procedurës janë në përputhje me legjislacionin për prokurimet publike.
Për herë të fundit, në mes të shkurtit, Komisioni hoqi pezullimin, duke i lejuar autoritetit kontraktor, Agjencinë Kombëtare të Shoqërisë së Informacionit, që zhvillon procedurën për llogari të Drejtorisë së Përgjithshme të Tatimeve, të vijojë me hapat e radhës./skyweb.al
