Një hetim i BBC ka zbuluar identitetin e një prej trafikantëve më të kërkuar të njerëzve, i cili dyshohet se qëndron pas shumicës së kalimeve ilegale me gomone përtej Kanalit të La Manshit në vitet e fundit.
Sipas raportimit, një 28-vjeçar kurd irakian ka operuar për vite me radhë nën pseudonimin “Kardo Ranya”, duke shmangur arrestimin dhe duke mbajtur të fshehtë identitetin e tij të vërtetë, gjë që ka vështirësuar përpjekjet e autoriteteve europiane për të lëshuar një urdhër ndërkombëtar arresti.
Hetimi i realizuar nga BBC, përmes podcast-it “Intrigue: To Catch A King”, tregon se gazetarët arritën të gjurmojnë rrjetin e tij nga kampet e migrantëve në veri të Francës deri në Kurdistanin irakian, ku u zbulua identiteti i tij dhe u realizua edhe një përballje direkte.
Rrjet i shtrirë nga Azia në Britani
Sipas raportimit, rrjeti i tij i trafikimit dyshohet se operon në një itinerar të gjerë që shtrihet nga Afganistani deri në Mbretërinë e Bashkuar, duke kaluar përmes disa vendeve të Evropës.
Emri “Ranya” lidhet me qytetin Ranya në Kurdistanin irakian, një zonë që sipas një raporti të Chatham House konsiderohet e ndikuar nga rrjete aktive të kontrabandës.
Zyrtarë të National Crime Agency kanë deklaruar se një pjesë e madhe e biznesit kriminal të kalimeve me gomone kontrollohet nga grupe kurde, ndërsa disa rrjete të lidhura me zonën e Ranyas janë tashmë në shënjestër të hetimeve.
Reklamim në rrjete sociale dhe “VIP shërbime”
BBC raporton se “Kardo Ranya” ka përdorur edhe rrjetet sociale për të reklamuar shërbimet e tij, duke publikuar video që promovojnë jetën në Britani dhe dëshmi nga persona që pretendojnë se kanë mbërritur me sukses.
Sipas një ish-kontrabandisti të cituar në hetim, rrjeti i tij kërkon rreth 17,000 euro për të transportuar një migrant nga Iraku deri në Mbretërinë e Bashkuar, duke ofruar një “shërbim VIP”, ndonëse më të shtrenjtë se konkurrentët.
Rruga e rrezikshme drejt Britanisë
Hetimi thekson se udhëtimi mbetet i paligjshëm dhe shumë i rrezikshëm, me raste të shumta fataliteti gjatë rrugës.
Kalimet me gomone janë bërë mënyra më e zakonshme e hyrjes së parregullt në Britani që nga viti 2020. Shumica e atyre që mbërrijnë aplikojnë për azil, duke pretenduar se nuk mund të jetojnë të sigurt në vendet e tyre për shkak të persekutimit ose dhunës.
Të dhënat e fundit tregojnë gjithashtu se shumica dërrmuese e atyre që ndërmarrin këtë udhëtim janë meshkuj nën moshën 40 vjeç.
Në dhjetor 2025, në sistemin e akomodimit për azilkërkues në Britani ndodheshin mbi 103,000 persona, të strehuar në hotele, banesa të përbashkëta ose struktura ish-ushtarake.
