Shërbimi i pastrimit në Bashkinë Poliçan është kthyer në një nga kontratat më të mëdha të financuara me para publike gjatë viteve të fundit. Dokumentet e procedurave të prokurimit tregojnë se nga viti 2016 deri në vitin 2026 janë lidhur kontrata me një vlerë totale që i kalon 1.5 miliardë lekët, ndërsa përfitues kanë qenë vazhdimisht kompanitë “COTONI CENTER” shpk dhe “MART-ENI” shpk, të lidhura me biznesmenin Patrik Caushi.
Tenderi më i fundit u zhvillua në vitin 2026 për shërbimin e pastrimit, gjelbërimit, dekorit dhe mirëmbajtjes së varrezave në Bashkinë Poliçan. Fondi limit i procedurës ishte 141.9 milionë lekë të reja pa TVSH dhe kontrata parashikohet të zbatohet për pesë vite.
Në garë morën pjesë tre operatorë ekonomikë, por vetëm bashkimi i operatorëve “COTONI CENTER” shpk dhe “MART-ENI” shpk paraqiti ofertë të vlefshme. Subjekti “2AF” shpk nuk dorëzoi dokumentacionin e kërkuar, ndërsa “REJ” shpk rezultonte e përjashtuar nga pjesëmarrja në tenderë. Si rezultat, kontrata iu dha bashkimit të kompanive të Patrik Caushit.
Procedura është identifikuar nga Open Data Albania me indikatorin “Flamur i Kuq”, për shkak të elementëve që lidhen me mungesën e konkurrencës efektive gjatë zhvillimit të prokurimit.
Dokumentet tregojnë se Patrik Caushi nuk është përfitues për herë të parë i kontratave të pastrimit në Poliçan. Në vitin 2021, bashkimi i kompanive “COTONI CENTER” shpk dhe “MART-ENI” shpk fitoi një tjetër kontratë pesëvjeçare me vlerë rreth 832 milionë lekë pa TVSH.
Më herët, në vitin 2016, kontrata e pastrimit me vlerë rreth 857 milionë lekë ishte fituar nga “COTONI CENTER” shpk, e cila në atë kohë drejtohej nga Arben Haxhiu dhe ishte në bashkim operatorësh me kompaninë “RINIA 96″ shpk, në pronësi të Shkëlqim Mirit.
Në vitin 2020, pronësia e ” shpk kaloi nga Arben Haxhiu tek Patrik Caushi, ndërsa Haxhiu vijoi të mbetej administrator i kompanisë. Ky ndryshim ndodhi në një periudhë kur bilancet financiare të shoqërisë raportonin humbje, megjithëse kompania kishte përfituar kontrata publike me vlera të konsiderueshme.
Ndërkohë, në dokumentacionin teknik të kontratës parashikohet që shërbimi të kryhet me një numër të kufizuar punonjësish dhe vetëm një automjet për transportin e mbetjeve. Kjo ka ngritur diskutime mbi raportin mes shumave të investuara dhe nivelit të shërbimit që ofrohet për qytetarët e Poliçanit.
Në qendër të debatit është vendosur edhe kryebashkiaku Adriatik Zotkaj, pasi të gjitha kontratat shumëvjeçare për pastrimin janë zhvilluar gjatë mandatit të tij. Gjithashtu, dokumente të publikuara ndër vite tregojnë se Zotkaj ka qenë subjekt verifikimesh nga institucionet e kontrollit të pasurisë, ndërsa kompani të lidhura me familjarë të tij kanë përfituar kontrata publike.
Vlera e lartë e fondeve, mungesa e konkurrencës në disa procedura dhe përsëritja e të njëjtëve fitues kanë ngritur pikëpyetje mbi mënyrën e administrimit të këtyre prokurimeve. Çdo përgjegjësi ligjore ose penale për personat e përmendur mbetet të përcaktohet vetëm nga organet kompetente të drejtësisë, bazuar në hetime dhe vendime zyrtare.
