Një tjetër skemë mashtrimi përmes platformave online është goditur nga policia, ndërsa katër persona kanë përfunduar në pranga dhe një tjetër është shpallur në kërkim.
Operacioni u zhvillua në një ambient në rrugën e Kavajës, i përshtatur me poste pune, ku dyshohet se ushtrohej veprimtaria e paligjshme. Sipas hetimeve, personat e përfshirë mashtronin qytetarë nga vende të ndryshme të Bashkimit Evropian përmes platformave online.
Në pranga kanë rënë katër persona, të moshave 31 deri në 42 vjeç, ndërsa pronari 45-vjeçar i ambientit është shpallur në kërkim. Një 23-vjeçare që dyshohet se ishte e përfshirë në aktivitet është proceduar në gjendje të lirë.
Gjatë ndërhyrjes, autoritetet sekuestruan 13 njësi kompjuterike, 19 telefona celularë, 7 laptopë dhe materiale të tjera që dyshohet se lidhen me aktivitetin.
Sipas policisë, ambienti administrohej nga pronari në bashkëpunim me personat e arrestuar, me qëllim zhvillimin e kësaj veprimtarie.
