Një tjetër incident ku janë përfshirë nxënës ka ndodhur në Shkodër. Ngjarja ka ndodhur të premten, kur disa nxënës nga zona e Vau Dejës, pas përfundimit të mësimit, kishin lënë takim për të “sqaruar” konfliktet mes tyre.
Ata u takuan pranë vendqëndrimit të furgonëve, me të cilët udhëtojnë çdo ditë drejt shkollës dhe në kthim, kur nisën të godisnin njëri-tjetrin me grushte e shqelma.
Në pamje shihen dy grupe adoleshentësh që fillimisht përplasen me grushte ndërsa dy prej tyre i shtrijnë në tokë, por situata përshkallëzohet dhe njëri prej tyre shihet duke mbajtur në dorë një thikë.
Ai nxjerr armën e ftohtë, vendos kapuçin e xhaketës në kokë dhe tenton të sulmojë grupin rival.
Fatmirësisht, nga ky konflikt nuk ka persona të plagosur apo të dëmtuar nga thika. Ndërhyrja e një zonje ka bërë që përplasja mes tyre të marrë fund, duke shmangur pasoja më të rënda.
