Lajm i mirë rikthimi, lajm i keq shfrytëzimi për propagandë qeveritare…

Nga Grigels Muçollari 
Nuk ka dyshim se kthimi në shtëpi i atyre fatkeqëve që nuk dihet mirë në çfarë rrethanash përfunduan para ca vitesh në përplasjen e përgjakshme në Siri dhe ngelën atje nëpër kampe pas mbarimit të luftës, është lajm i mirë. Dhe sot mësuam se disa familjarë, fëmijë, gra dhe mes tyre edhe të moshuar, erdhën në Rinas.
Nga indoktrinimi apo nga ndonjë financim i errët, jo pak shqiptarë u bënë pjesë e atij konflikti të largët. Vetëm të imagjinosh tmerrin që kanë kaluar, riatdhesimi të gëzon e të jep një ndjesi të mirë.
Por, si në çdo rast tjetër, Edi Rama nuk e la këtë zhvillim që të jetë njerëzor. Ai e paketoi si një arritje qeveritare dhe i mori fatit të këtyre fatkeqëve gjithçka të mundshme për ta shndërruar në propagandë.
Edhe më parë, kur pati një riatdhesim, bënë të njëjtën gjë. U shfaqën qeveritarët dhe vetë Rama si kauboj që po udhëhiqnin vetë aksionin në kushte të vështira lufte. Duke luftuar e duke u sakrifikuar shumë për shqiptarët.
Edhe sot skena e mbërritjes në mëmëdhe ishte shndërruar në një platformë propagande. Gjithë prozhektorët drejtuar nga Ministri dhe Drejtori i Policisë, të cilët prisnin avionin në pistë. Dhe natyrisht, shënimi i Kryeministrit që ishte dhe headline në mediat e tij.
Ata sigurisht se nuk kanë ndërmend të kujdesen për një lloj diskrecioni dhe mos-ekspozimi të rasteve, për të ruajtur dinjitetin e këtyre viktimave. Ata duan çdo ditë mish për të furnizuar industrinë e publicitetit.
Edhe pse mund ta bënin në heshtje, edhe pse mund të investonin më shumë për riintegrimin e tyre sesa për të rrahur gjoksin për rikthimin. Do të ishte më normale që një qeveri të punonte për shkaqet që i detyruan apo manipuluan këta njerëz të shkonin në atë ferr, sesa të bëjë protagonisten me fatin e tyre.
Propaganda është vetë ekzistenca e Edi Ramës. Ai nuk kursen asgjë dhe askënd për të marrë ca kredite në publik. Sidomos tani që është në kuotën më të ulët të imazhit, pas shpërthimit të protestave dhe revoltës popullore ndaj qeverisjes së keqe, korrupsionit dhe arrogancës