Kuvendi miratoi sot me votat e socialistëve heqjen e imunitetit për deputetin Sali Berisha, duke i hapur rrugën SPAK që të kërkojë në GJKKO ndryshimin e masës së sigurisë ndaj ish-Kryeministrit nga detyrim paraqitje në arrest shtëpie ose me burg.
Autorizimi i Kuvendit, që mban firmën e Lindita Nikollës, iu përcoll SPAK-ut, i cili tashmë mund ti drejtohet në çdo kohë GJKKO për masën e sigurisë ndaj Berishës.
SPAK nuk ka ndonjë afat se kur mund t’i drejtohet GJKKO, ndërsa kjo e fundit është e detyruar që brenda 48 orësh nga momenti që kërkesa paraqitet, në dhomë këshillimi të marrë një vendim.
Gjyqtarja që do të vlerësojë masën për ish-Kryeministrin është sërisht Irena Gjoka, e atakuar drejtpërsëdrejti nga Berisha, dhe që më parë kishte caktuar dy masat që nuk u respektuan “detyrim paraqitje” dhe “ndalim të daljes nga vendi”.
Gjithashtu prokurorët që tashmë kanë në duar autorizimin janë Arben Kraja dhe Enkelejda Millonai, edhe këta të atakuar nga ish-Kryeministri.
Kraja dhe Millonai mund ta paraqesin në çdo kohë kërkesën e tyre në GJKKO, e cila pasi të marrë një vendim njofton SPAK dhe më pas nis zbatimi i vendimit, nga Byroja Kombëtare e Hetimit dhe Policia së Shtetit.
Në rast të masës së sigurisë arrest shtëpie, Berisha brenda 5 ditësh duhet të paraqitet në seancë gjyqësore për t’ia komunikuar edhe nga trupa gjykuese.
Por nuk përjashtohet mundësia që për të shmangur arrestin, ish-Kryeministri përmes avokatëve të tij, përmes një shkrese drejtuar SPAK të pranojë masat që u refuzuan më herët, veçanërisht ajo e detyrimit të paraqitjes.
Nuk dihet nëse Berisha do të shfrytëzojë këtë mundësi, apo do të zgjedhë të presë veprimet e SPAK, ndërkohë që pritet që çështja e parë, pra caktimi i masave të sigurisë “detyrim paraqitje” dhe “ndalim të daljes jashtë vendit”, që u konsideruan të paligjshme nga ish-Kryeministri për shkak se më parë SPAK nuk kishte marrë autorizim nga Kuvendi, të shqyrtohet nga Gjykata e Lartë.
Me vendimin e Gjykatës së Lartë, nëse kjo e fundit do të qëndrojë në linjën e GJKKO-së, Berishës i lind e drejta për ta çuar çështjen në Kushtetuese dhe më pas në Strasburg, sikundër ka deklaruar më parë.
