Një atentat i përgjakshëm tronditi Tiranën mesditën e sotme. Gilmando Dani, një emër i njohur për drejtësinë dhe pjesë e grupit të Emiljano Shullazit, u ekzekutua me breshëri automatiku pranë Rinasit, ndërsa ndodhej brenda një automjeti luksoz të blinduar.
Sipas burimeve policore, atentatorët e kanë ndjekur automjetin për disa kilometra përpara se të hapnin zjarr, duke e lënë Danin të vdekur në vend dhe shoqëruesin e tij të plagosur rëndë.
Raportohet se mjeti në të cilin udhëtonte viktima është në pronësi të Elvis Kosovës, të njohur në botën e makinave dhe garave me pseudonimin “Visi i Garave” një detaj që ka ngritur shumë pikëpyetje për hetuesit.
Kush është Elvis Kosova (Visi i Garave)?
Elvis Kosova, 39 vjeç, është një figurë që për vite ka tërhequr vëmendjen e mediave dhe policisë shqiptare. Ai është i njohur për pasionin e tij për makinat sportive dhe garat ilegale, por edhe për biznesin e blerje-shitjes së makinave luksoze në Tiranë.
Në vitin 2021, Kosova fitoi një garë drag-race në Kosovë, ku makina e tij “Nissan GTR” përshkoi 402 metra në më pak se dhjetë sekonda. Kjo fitore e bëri një nga figurat më të njohura në komunitetin e adhuruesve të makinave të shpejta.
Por fama e “Visit të Garave” nuk mbeti vetëm në pistë. Ai është arrestuar më herët për përfshirje në një skemë mashtrimi që përfshinte një makinë tip “Audi” me vlerë rreth 200 000 euro, si dhe është hetuar për gara të paligjshme në aksin Laç–Mamurras.
Në korrik 2025, garazhi i tij pranë Liqenit të Thatë u bë shënjestër e një sulmi me tritol, që shkaktoi dëme të konsiderueshme materiale. Pas shpërthimit, Kosova deklaroi se “nuk ka konflikte me askënd”, por ngjarja i dha një tjetër nuancë të errët figurës së tij.
