Korça po përballet me një tkurrje demografike që po thellohet vit pas viti, ndërsa shifrat e fundit të INSTAT tregojnë një bilanc alarmues mes lindjeve dhe vdekjeve.
Sipas të dhënave të publikuara nga INSTAT, në tremujorin e dytë të këtij viti, në qarkun e Korçës janë regjistruar 265 vdekje më shumë se lindje, duke i dhënë këtij qarku bilancin natyror më negativ në të gjithë Shqipërinë.
Shifrat tregojnë se situata nuk është një fenomen i izoluar i këtij viti. Në të njëjtën periudhë të vitit 2023, diferenca mes lindjeve dhe vdekjeve ishte 184. Brenda tre vitesh, bilanci negativ është thelluar me rreth 44%.
Por shifra bëhet edhe më shqetësuese kur merret parasysh se këtu nuk përfshihet emigracioni. Pra, numri i personave që largohen nga Korça drejt vendeve të tjera nuk pasqyrohet në këtë bilanc.
Deputetja e Partisë Demokratike, Ledina Alolli, e ka cilësuar situatën një alarm serioz për qarkun, duke akuzuar qeverinë se nuk po ndërmerr politika të mjaftueshme për frenimin e tkurrjes demografike.
Sipas saj, pas imazhit të zhvillimit dhe investimeve që promovohen nga qeveria, realiteti në terren është ai i një qarku që po plaket dhe po humbet gradualisht popullsinë e re.
“Korça nuk mbahet gjallë me fasada, festa dhe fotografi”, shprehet Alolli, duke kërkuar politika që të krijojnë vende pune, të mbështesin bujqësinë dhe t’u japin familjeve më shumë siguri ekonomike.
Deputetja thekson se largimi i të rinjve dhe rënia e lindjeve janë dy prej problemeve kryesore që po e rëndojnë të ardhmen demografike të qarkut.
“265 nuk është thjesht një numër statistikor. Është një alarm”, shprehet Alolli.
Ajo e mbyll reagimin me një kritikë të drejtpërdrejtë ndaj qeverisë, duke deklaruar se nëse ky alarm përsëritet prej vitesh pa sjellë ndryshim të politikave, atëherë nuk bëhet më fjalë thjesht për administrim të zhvillimit.
“Po administron boshatisjen”, përfundon deputetja e PD-së.
POSTIMI I PLOTE
