Të gjithë personat që humbën jetën në aksidentin e ndodhur në kantierin e ndërtimit në HafenCity të Hamburgut, janë shqiptarë. E ndërsa më herët u zbuluan trupat e 3 viktimave, mbrëmjen e sotme nga grupet e kërkimit, u gjet i pajetë edhe trupi i katërt, i punëtorit që humbi jetën.
Mëngjesin e së martës në orën 7.30, në kantierin e ndërtimit mbërritën shumë grupe shpëtimi që vijuan operacionin e kërkimeve.
Në operacion u përfshinë ekipe zjarrfikësish, por edhe ekspertë industrialë nga një kompani specialistësh, që fillimisht siguruan skenën e aksidentit me qëllim që të vazhdonin kërkimet.
Aksidenti që i mori jetën minimalisht 4 personave ndodhi mëngjesin e së hënës, kur një skelë e vendosur në katin e 8-të u shemb.
Personat që ndodheshin mbi skelë u “varrosën” nga materiale të shumta që ranë mbi to, duke shkaktuar humbjen e jetës së 3 personave në mënyrë të menjëhershme. Trupi i katërt u gjet mbrëmjen e së martës, njoftojnë mediat gjermane.
“Në këto orë të vështira, mendimet tona janë kryesisht me viktimat, familjet e tyre dhe të gjithë ata që punojnë në kantierin e ndërtimit. Ekipi ynë lokal ofron mbështetje për shërbimet e emergjencës në terren dhe bashkëpunon ngushtë me autoritetet përkatëse. Ne kërkojmë mirëkuptimin tuaj se ne nuk jemi në gjendje t’ju japim ndonjë informacion të mëtejshëm në këtë kohë”, u shpreh një nga zëdhënësit e kompanisë, raportojnë mediat gjermane.
Fillimisht u raportua se personat që humbën jetën ishin bullgarë, por më pas policia konfirmoi se bëhej fjalë për shtetas shqiptarë. E ndërsa hetimet vijojnë, dyshohet se shkak për aksidentin tragjik ishte mbipesha dhe mos ankorimi siç duhet i skelës, referuar kushteve teknike të montimit.
Sipas hetimeve paraprake, të siguruara nga BILD, rreth 80 blloqe betoni të aeruara Ytong (secila me peshë rreth 20 kilogramë) ishin mbështetur në të, në mënyrë që t’i instalonin më vonë. Thuhet se gurët janë futur në skela midis katit të tretë dhe të katërt.
Lidhur me ngjarjen pati një konfuzion përsa i takon numrit të viktimave por edhe shtetësisë së tyre. Fillimisht u raportuan për 5 jetë të humbura, më pas për 4 dhe shifra zbriti në 3. Por në mbrëmje pati sërisht një korrigjim të shifrave, duke u deklaruar 4 viktima, të gjithë shqiptarë. Nuk dihet sepse u deklarua se personat që humbën jetën ishin shqiptarë, por dyshohet se ata ishin regjistruar si bullgarë, deri në momentin që janë kryer hetimet nga policia që qartësoi shtetësinë e tyre. Ndërkohë lidhur me pasaktësitë në raportimet mbi numrin e viktimave, përgjegjësia, sipas mediave gjermane, bie mbi urgjencën, e cila bëri raportimin e parë, më pas shifrat ndryshuan.
