Ish-drejtori i Policisë së Shkodrës, Gentian Berberi, është përjashtuar nga radhët e Policisë së Shtetit pas një procedure disiplinore të zhvilluar nga Drejtoria e Standardeve Profesionale.
Vendimi nuk është ende përfundimtar, pasi pritet të kalojë për shqyrtim në Komisionin e Apelimit.
Berberi ishte më herët i pezulluar nga detyra dhe ndaj tij ishte hapur një hetim disiplinor pas një incidenti të ndodhur në ambientet e Drejtorisë së Përgjithshme të Policisë së Shtetit. Ai ishte transferuar në një sektor tjetër pas largimit nga drejtimi i Policisë së Shkodrës, me argumentin e performancës së dobët në luftën kundër kultivimit të kanabisit.
Sipas burimeve administrative, gjatë qëndrimit në detyrën e re, ai është përfshirë në një konflikt verbal në Drejtorinë e Burimeve Njerëzore, pas pakënaqësisë për pozicionin e caktuar, çka më pas u raportua si sjellje e papërshtatshme në vendin e punës.
