Drejtori i Publik Media është vënë nën kërcënim të drejtpërdrejtë përmes mesazheve telefonike nga një numër i huaj anglez, që dyshohet të lidhet me Granit Pepnikën, i përfshirë në industrinë e call center-ave, pas një publikimi investigativ të bërë rreth një vit më parë.
Autori i mesazheve përdor gjuhë të rëndë dhe kërcënuese: “Sa të kem një jetë do jesh në gjak me mu… do shesh edhe gjakun e trupit dhe do të vras”, thuhet ndër të tjera në mesazh, ndërsa përmendet edhe një person i tretë.
Pavarësisht përpjekjeve të redaksisë për të sqaruar situatën dhe për të kuptuar arsyen e këtyre mesazheve, komunikimi ka vijuar me tone edhe më kërcënuese: “Kujdes djalin… e di shumë mirë ti… nuk ka zot që e mbyll këtë muhabet”.
Publik Media nuk ka frikë nga tipat që kërcënojnë pas telefonave, por fillimisht njoftoi organet e rendit për këto mesazhe, të cilat përbëjnë një formë të pastër intimidimi ndaj medias dhe lirisë së shprehjes.
Rasti pritet të ndiqet nga organet ligjzbatuese, pasi përmbajtja e mesazheve përmban elementë të qartë të kanosjes dhe kërcënimit penal.
Ky incident ngre sërish shqetësimin për presionin dhe rrezikun ndaj gazetarëve dhe drejtuesve të mediave në Shqipëri, veçanërisht kur trajtojnë tema sensitive që prekin interesa të fuqishme ekonomike.
Në fund, dy fjalë për “gurin” dhe guralecët e call center-ave: burrat nuk shajnë e kërcënojnë lajmesin pas sediljeve të makinave luksoze të përfituara me mashtrime pleqsh në Perëndim. Publik Media dhe djali im nuk kanë faj pse drejtoria e policisë bastisi burimet e mashtrimit të milionave. Granit, i ke hapur shumë punë vetes dhe ke gjetur njeriun e gabuar në media, duke menduar se ka frikë të thotë të vërtetën. Gabohesh. /Naim Noka
