Policia e Sarandës ka finalizuar operacionin “Silent Crossing”, në kuadër të të cilit është zbuluar dhe dokumentuar një rast i trafikut të paligjshëm të mjeteve lundruese nga Greqia drejt Shqipërisë.
Operacioni u zhvillua pas një kallëzimi të bërë nga një shtetas grek, i cili njoftoi se gjatë natës së 28 qershorit, në ishullin e Korfuzit i ishin vjedhur dy mjete lundruese, një gomone dhe një skaf.
Ai dyshonte se këto mjete ishin trafikuar në territorin shqiptar.
Pas hetimeve të kryera nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Sarandë, u bë e mundur arrestimi në flagrancë i shtetasit D. D., 23 vjeç, banues në Gjashtë, Sarandë.
Gjithashtu, janë shpallur në kërkim tre persona të tjerë:
- J., 48 vjeç, banues në Sarandë
- J., 24 vjeç, banues në Sarandë
- K., 48 vjeç, banues në Tepelenë
Sipas të dhënave nga grupi hetimor, katër shtetasit e mësipërm dyshohet se kanë marrë pjesë në vjedhjen e dy mjeteve lundruese në Korfuz dhe më pas i kanë trafikuar ato në Shqipëri, konkretisht në Sarandë.
Gjatë kontrolleve të kryera në vijim të operacionit, një prej mjeteve lundruese të vjedhura u gjet i fshehur në një parcelë në fshatin Vrion të bashkisë Finiq. Mjeti u sekuestrua në cilësinë e provës materiale, së bashku me një kamion që dyshohet se është përdorur për transportimin e mjeteve nga bregdeti drejt parcelës.
Policia vijon punën për kapjen e të shpallurve në kërkim, si dhe për identifikimin e personave të tjerë të përfshirë në këtë aktivitet kriminal. Materialet procedurale janë referuar në Prokurori për veprime të mëtejshme.
