Kandidatja për deputete e Koalicionit Euroatlantik, Taulanda Jupi, ka reaguar ashpër ndaj gjuhës fyese që sipas saj po përdor qeveria aktuale ndaj burrave shqiptarë, duke e cilësuar këtë një përpjekje të ulët për përçarje në prag të zgjedhjeve.
“Të quash burrat shqiptarë ‘çyrykë’ nuk është vetëm një fyerje, por një akt i ulët përçarjeje. Është mungesë respekti për themelin e shoqërisë shqiptare: familjen, punën, sakrificën dhe nderin,” deklaroi Jupi.
Ajo vuri në pah rolin e burrave në shoqërinë shqiptare, duke i cilësuar si “heronj të heshtur të përditshmërisë” që kontribuojnë në ekonomi, rend dhe familje.
Jupi theksoi vizionin e saj për një Shqipëri të bashkuar, me politika që investojnë në arsim, punësim dhe dinjitet për çdo qytetar – pa dallim gjinie.
Postimi i plotë
Të quash burrat shqiptarë “çyrykë” nuk është vetëm një fyerje. Është një akt i ulët përçarjeje. Është mungesë respekti për themelin mbi të cilin është ndërtuar shoqëria shqiptare: familja, puna, sakrifica dhe nderi.
Burrat shqiptarë nuk janë objekte propagande elektorale. Ata janë heronj të heshtur të përditshmërisë sonë. Ata që punojnë në miniera, që ndërtojnë qytetet tona, që mbajnë sipërmarrjet gjallë, që mbrojnë rendin dhe ligjin, që rrisin fëmijët me mundin dhe djersën e tyre.
Fushata nuk është luftë mes shqiptarëve. Fushata është një garë ndërmjet projekteve: se si qeveriset më mirë Shqipëria dhe cila është e ardhmja që shqiptarët ëndërrojnë. Zgjedhjet nuk janë luftë fyerjesh. Janë një moment serioz për të zgjedhur drejtimin e vendit.
Por përçarja është arma e fundit e një qeverisjeje që nuk ka më as ide, as shpresë për të ofruar. Pasi nuk ka lënë përçarje pa bërë, mes qytetesh e fshatrash, mes të rinjve e të moshuarve, mes veriut dhe jugut. Tani Rama ai ka hyrë edhe në familje për të përçarë burrat dhe gratë.
Familja shqiptare nuk ka nevojë t’i fusësh flakën e përçarjes. Ajo ka nevojë për bashkim, për mbështetje, për politika që ndihmojnë prindërit të rrisin fëmijët e tyre me dinjitet këtu, në vendin e tyre. Shqipëria nuk ka nevojë për ndarje. Ka nevojë për drejtim të ri.
Ne nuk do t’i ndajmë shqiptarët në gra dhe burra. Por do t’i bashkojmë në një projekt të përbashkët për arsim, kulturë, punë dhe dinjitet.
Sepse Shqipëria nuk ndërtohet me përçarje. Ndërtohet me respekt, me vlera dhe me punë.
✅ Voto Taulanda Jupi
✅ Voto Koalicioni Euroatlantik
