Gjelbrim Taipi nuk e nisi si titullar në fitoren e djeshme ndaj Laçit, me Abilaliajn që e aktivizoi në startin e pjesës së dytë.
Në fund, “vjedhurazi” u fut mes shtatlartëve në zonë dhe me një goditje me kokë shënoi golin e tij të parë me Partizanin dhe të parin në këtë mënyrë në gjithë karrierën e tij. Këtë detaj dhe shumë të tjera “hero” i ndeshjes i zbulon në një prononcim ekskluziv për “Panorama Sport”.
Jeni skuadra më në formë e momentit. Gjithsesi, e ndani kreun me Egnatian. Sa kohë do t’ju duhet për t’u vënë të vetëm në vendin e parë?
Është e vërtetë, mund të themi se jemi ekipi më në formë i momentit, sepse kemi marrë 5 fitore radhazi, duke mos nënvlerësuar asnjë kundërshtar. Egnatia ka një skuadër shumë të fortë, me futbollistë me kualitet të lartë. Edhe ata po punojnë njëjtë dhe unë mendoj se nuk do të arrijmë të shkëputemi shumë me pikë ndaj tyre dhe lufta do të vijojë deri në fund, sepse edhe ata kanë ekip shumë cilësor. Skuadra që do të bëjë më pak gabime, do ta mbyllë në krye.
Sa ju çliron ky gol për në vazhdim?
Padyshim, tani do të jem më i çlirët. Unë kur erdha u konsiderua një transferim i rëndësishëm dhe u përfol shumë, çka bën që normalisht të pritet shumë nga unë. Jam i ndërgjegjshëm që duhet t’ia shpërblej drejtorit, që ka insistuar në maksimum, po ashtu edhe klubit, që më ka besuar që nga dita e parë, kur kam luajtur që në start si titullar. Duhet të jem i ndërgjegjshëm edhe me veten që duhet të shpërblej këtë besim, pavarësisht se unë kam bërë ndeshje pozitive, por nganjëherë nuk mjaftojnë përderisa nuk ke arritur të shënosh. Sot (dje) më në fund shënova. Ishte një gol i veçantë për mua, sepse nuk kam shënuar asnjëherë më parë gol me kokë në karrierë.
