Pesë persona kanë përfunduar në pranga në Itali, në kuadër të një operacioni kundër trafikut të kokainës. Mes të arrestuarve janë edhe dy shtetas shqiptarë, rezidentë në rajonin e Lombardisë. Sipas autoriteteve italiane, njëri prej tyre, 49 vjeç, dyshohet se ishte furnizuesi kryesor i lëndës narkotike në zonën ku vepronte rrjeti.
Operacioni u zhvillua nga Karabinierët, pas një hetimi të nisur në muajin shkurt. Gjithçka nisi pas sekuestrimit të disa gramëve kokainë te persona që dyshohej se e kishin blerë drogën në banesën e një 59-vjeçari.
Pas këtij zbulimi, hetuesit zgjeruan veprimet hetimore përmes përgjimeve dhe vëzhgimeve, duke identifikuar një rrjet të dyshuar të furnizimit dhe shpërndarjes së kokainës. Sipas dosjes hetimore, lënda narkotike u dërgohej klientëve drejtpërdrejt në banesat e tyre, por edhe në vendet e punës.
Gjatë hetimeve u dokumentuan gjithashtu dy raste të transportimit të drogës. Dy persona, përkatësisht 59 dhe 62 vjeç, ishin arrestuar më herët, pasi gjatë kontrolleve në automjetet e tyre u gjetën 100 dhe 33 gramë kokainë.
Në mesin e të arrestuarve është edhe 49-vjeçari shqiptar, i cili prej disa muajsh ndodhet në burg për një tjetër çështje penale. Ai dyshohet se ka lidhje me një ngarkesë prej 94 kilogramësh kokainë të sekuestruar më parë, një pjesë e së cilës, sipas hetuesve, mund të ishte destinuar për tregun e drogës në zonën e Triestes.
Pas ekzekutimit të masave të sigurisë, tre shtetasit italianë u transferuan në burgun e Triestes, ndërsa dy shqiptarët u dërguan në institucionet e vuajtjes së dënimit në Bergamo dhe Breshia.
Të pesë personat dyshohen për mbajtje dhe trafikim të lëndëve narkotike. Ndërkohë, autoritetet italiane vijojnë hetimet për të zbardhur plotësisht aktivitetin e rrjetit dhe rolin e secilit prej personave të përfshirë.







