Policia greke ka goditur një organizatë kriminale të trafikut të drogës në Athinë, duke arrestuar katër persona, përfshirë edhe këngëtarin shqiptar nga Tepelena, Kostandinos Jorgji, i njohur me emrin artistik “For3al”.
Operacioni u zhvillua në pasditen dhe mbrëmjen e së martës, më 16 dhjetor 2025, nga Nëndrejtoria e Narkotikëve, e cila arrestoi dy shtetas shqiptarë, 55 dhe 30 vjeç, dhe dy shtetas grekë, 22 dhe 30 vjeç, të cilët u kapën duke poseduar lëndë narkotike me qëllim trafikimi.
Hetimet zbuluan se organizata kishte një strukturë të mirëorganizuar dhe rolet e ndara qartë.
55-vjeçari shqiptar, kreu i organizatës kriminale, ishte përgjegjës për gjetjen, ruajtjen e drogës si dhe për mbledhjen dhe ruajtjen e fitimeve të organizatës kriminale, 30-vjeçari Kostandinos Jorgji, ishte zëvendëskryetari i organizatës kriminale dhe ishte përgjegjës për ruajtjen e lëndëve narkotike, së bashku me 55-vjeçarin.
Një shtetas 22-vjeçar grek ishte përgjegjës për ruajtjen dhe sigurimin e drogës, së bashku me 55-vjeçarin dhe 30-vjeçarin, si dhe për dorëzimin e sasive të drogës te transportuesi i organizatës, në mënyrë që ato të shpërndaheshin më pas te trafikantët dhe përdoruesit e tjerë.
Vrasja e pronarit grek dhe punëtorit shqiptar në Finikounda, vetëdorëzohet 30-vjeçari
Ndërsa një tjetër shtetas grek 30-vjeçar, ishte përgjegjës për transportin dhe trafikimin e sasive të lëndëve narkotike.
Mësohet se ata tregtonin sasi marijuane dhe hashashi çokollatë te individë të ndryshëm, duke e shitur marijuanën për 2.500 euro për kilogram dhe hashashin çokollatë për 5.000 euro për kilogram.
Gjatë kontrolleve u sekuestruan 1.907 gramë hashash çokollatë, 15.153 gramë marijuanë, një automjet, një motorr, një jelek antiplumb, katër peshore precize, një numërator parash, katër celularë dhe 51.490 euro. Vlera e përfitimeve të paligjshme nga aktiviteti i tyre kap shifrën mbi 95.000 euro.
Vërehet se 55-vjeçari dhe 22-vjeçari kanë qenë të përfshirë në të kaluarën në vepra të ngjashme dhe të tjera penale. Personat e arrestuar u dërguan në Prokurorinë kompetente dhe iu referuan një oficeri hetues.
