Ministria e Shëndetësisë ka bërë të ditur se aktualisht 17 persona po marrin shërbim mjekësor në Qendrën Spitalore Universitare “Nënë Tereza” (QSUT) dhe në Spitalin Universitar të Traumës (SUT), pas ngjarjeve të lidhura me protestën.
Sipas autoriteteve, të gjithë pacientët ndodhen jashtë rrezikut për jetën.
Në QSUT janë paraqitur 10 protestues. Prej tyre, tre kanë marrë ndihmën e nevojshme mjekësore dhe janë larguar nga spitali me rekomandimin e mjekëve. Katër protestues po trajtohen në Urgjencë, ndërsa tre të tjerë në shërbimin e Toksikologjisë.
Ndërkohë, në Spitalin Universitar të Traumës po marrin trajtim gjashtë efektivë policie dhe një protestues. Sipas njoftimit zyrtar, të gjithë janë jashtë rrezikut për jetën dhe vijojnë të marrin kujdesin e nevojshëm mjekësor.
