Në tregun e fruta-perimeve në Korçë, një tregtar që prej vitit 2004 punon një bar-kafe të vogël. Por, prej vitit 2015, pa dijeninë e tij, biznesi i vogël ishte tatuar në burim sikur të ishte pjesë e një kategorie tjetër tatimore. Si rezultat, në sistemin e tatimeve ishte krijuar një debi prej 15 milionë lekësh të vjetra, e cila rëndonte padrejtësisht mbi qytetarin për katër vite rresht.
Gazetari i emisionit “Stop”, përmes një kamere të fshehtë, verifikoi rastin pranë Drejtorisë së Tatimeve Korçë, ku u zbulua se ndryshimi i kategorisë së biznesit mund të ishte bërë gabimisht nga inspektori tatimor në vitin 2015.
Denoncuesi: Përgjegjësinë Tatimore, kush ma ka hapur në 2015-ën?
Tatimet Korçë: Në 2015-ën…shërbimet.
Denoncuesi: Edhe ma kanë mbyllur në 2019-ën.
Tatimet Korçë: Shërbimi poshtë ta ka hapur…
Denoncuesi: Kush?
Tatimet Korçë: Shërbimi që është poshtë në kat të parë, ata i bëjnë përgjegjësit tatimorë. Ata i hapin, ata i mbyllin, po, po ata i çelin, ata i mbyllin, po që në 2015-ën, janë 10 vite …
Denoncuesi: Unë kam 4 vite, që ankohem.
Sipas të dhënave zyrtare, në vitin 2019 kur qytetarit i është hequr përgjegjësia për t’u tatuar që në burim, duhet t’i ishte hequr shuma financiare prej 4 vitesh që rëndonte në subjektin e tij.
Tatimet Korçë: Ti, në momentin që je tek fruta-perimet ia paguan Bashkisë…
Denoncuesi: Na i paguan tregu neve…
Tatimet Korçë: Po e di o e di…
Denoncuesi: Pa shikoje, sa milionë më ka vajtur mua ajo! Unë duhet të shitem i tëri, unë në bankë nuk shkoj dot se kam gjoba për ditë…
Më pas, denoncuesi dhe gazetari takuan drejtoreshën e Tatimeve në Korçë, e cila deklaroi se nuk ishte në dijeni të problemit, por u tregua e gatshme të bashkëpunonte duke premtuar zgjidhje të menjëhershme.
Gazetari: Për rastin e zotërisë, a mund ta flasim pak që të kemi edhe një zgjidhje se po e ndjekim…?
Drejtoresha e Tatimeve Korçë: Shiko! Nuk ke faj, por janë procedura që kur kalojnë afatet ligjore, është një çikë e vështirë të procedojmë. Megjithatë, të thashë që do të bëjmë të pamundurën! Sikur edhe 1% hapësirë ligjore, unë do të të ndihmoj! Fare, jo ti, po kushdo të vijë këtu dhe të ketë nevojë, kjo derë është gjithmonë e hapur!
Pas shumë verifikimeve dhe konsultimeve me Drejtorinë e Përgjithshme të Tatimeve, drejtuesja lokale i fshiu debinë 15 milionë lekëshe qytetarit duke i dhënë fund pas 10 vitesh një padrejtësie të shkaktuar nga një gabim njerëzor administrativ.
/Emisioni “Stop”
