Rei Nozlli është shoqëruar në polici pas një incidenti të dhunshëm të ndodhur në ambientet e Qendrës së Numërimit të Votave në zonën e Kasharit, ku goditi me grusht sekretarin e Komisionit Zonal të Administrimit të Zgjedhjeve (KZAZ) nr. 30, Remzi Mehmeti.
Ngjarja ndodhi në prani të komisionerëve, vëzhguesve dhe përfaqësuesve të forcave politike, duke shkaktuar kaos dhe ndërprerje të përkohshme të procesit të numërimit të votave. Sipas informacioneve paraprake, Rei Nozlli është identifikuar si një nga vëzhguesit e kandidatit të Partisë Socialiste, Ornaldo Rakipi.
Incidenti vjen pas një përplasjeje për vlefshmërinë e një flete votimi ku ishin shënuar dy kandidatë të ndryshëm të PS-së, çka shkaktoi debat dhe tension mes përfaqësuesve të forcave politike brenda qendrës së numërimit.
Policia ka ndërhyrë pas incidentit dhe ka shoqëruar autorin në Komisariatin nr. 6 në Tiranë, ndërsa sekretari i dhunuar, Remzi Mehmeti, ka bërë kallëzim zyrtar për ngjarjen. Partia Demokratike e ka cilësuar rastin si një “krim zgjedhor të kapur në flagrancë” dhe ka paralajmëruar se do të ndjekë çështjen edhe në SPAK.
