Kalimi i rrugës në kundërshtim me semaforin apo jashtë vijave të bardha po u kushton gjoba qytetarëve në Tiranë. Policia Rrugore ka ndëshkuar 78 këmbësorë gjatë 24 orëve të fundit, ndërsa kontrollet po kryhen jo vetëm nga efektivët në terren, por edhe përmes monitorimit me dronë.
Në fokus të aksionit janë qytetarët që nuk respektojnë sinjalistikën rrugore dhe kalojnë në vende të palejuara, duke rrezikuar sigurinë e tyre dhe të përdoruesve të tjerë të rrugës. Për këto shkelje parashikohen masa administrative, me gjoba që sipas njoftimit arrijnë deri në 1 mijë lekë.
Përveç kontrolleve fizike në rrugët e kryeqytetit, Policia Rrugore po përdor edhe teknologjinë për të evidentuar shkeljet nga ajri. Përmes dronëve monitorohen lëvizjet e këmbësorëve, por edhe sjellja e drejtuesve të automjeteve në raport me rregullat e qarkullimit.
Gjatë monitorimeve janë konstatuar gjithashtu drejtues mjetesh që nuk kanë respektuar vendkalimet e këmbësorëve, ndaj të cilëve janë marrë masa përkatëse.
Sipas Policisë Rrugore, këto kontrolle synojnë të rrisin sigurinë në rrugë dhe të parandalojnë aksidentet, veçanërisht në zonat me qarkullim të lartë.
Autoritetet u bëjnë thirrje qytetarëve të respektojnë semaforët, të përdorin vijat e bardha dhe të shmangin kalimet e rrezikshme. Kontrollet në Tiranë do të vijojnë, ndërsa monitorimi me dronë po përdoret si një tjetër mjet për evidentimin e shkeljeve rrugore.
