Në Gjykatën Themelore në Prishtinë, do të mbahet paraditen e sotme seanca gjyqësore ndaj bashkëshortit të Liridona Ademajt, Naim Murseli si organizator i vrasjes, si dhe dy të dyshuarve të tjerë Granit Plava dhe Kushtrim Kokalla.
Pas përfundimit të seancës, gjykatësi i procedurës paraprake pritet të caktojë nga një muaj paraburgim për të dyshuarit.
Pas kësaj ngjarjeje të rëndë ka pasur reagime të shumta nga institucionet dhe shoqëria civile në Kosovë.
30 vjeçarja, Liridona Ademaj, u vra më 29 nëntor, ndërkohë që bashkëshorti i saj dyshohet se e planifikoi krimin në mënyrë që të përfitonte miliona euro nga sigurimi i jetës që viktima kishte në Suedi.
Familjarët e të ndjerës i kanë dhënë dy ditë kohë të afërmve të Naim Murselit që të largohen nga Kosova, pasi kanë paralajmëruar vetëgjyqësi.
Vëllai i Liridonës tha dje se që prej fillimit dëshmia e dhënë nga Naimi ka qenë për ta kontradiktore.
“Tha që ‘na kanë nalë; na kanë kidnapu; qitni krejt çka i keni, unë i kam qitë krejt edhe i kam thanë edhe i kam thanë motrës tënde Liridonës jepje krejt çka i ki, mos kqyr’. Tha që ‘ka rezistu diçka në çantë’. Më tha unë ‘i kam qelë dyert edhe u kam thanë ikni në gjuhën suedeze’”.
“Më tha ‘unë i kapa fëmijët e dola, kur kqyra mas nuk ish kanë Liridona’. Çfarë burri është ai që i merr fëmijët e nuk e kqyr ku është nana? Dyshimet tona aty filluan“, tha Ademaj.
Ademaj madje u shpreh se Murseli as nuk është përgjigjur në telefon dhe sipas tij ka qenë në Swiss Diamons “ish kanë ulur, tu hangër e t’u pi, kish pas porositë sende”.
“Kur shkova në mjekësinë ligjore i thanë ‘Naim dukatin e senet tjera me vlerë i ki mrena’. E ka pasur vetëm një plumb nga ana e veshit të djathtë. Ka pasur sigurime të nalta në Suedi; e ka pas për me ia marr paret e sigurimit”, tha vëllau i të ndjerës.
