Një denoncim ka ardhur në redaksinë e Maska.al ku në qendër janë dy vëllezër, N.D i dënuar më herët për kultivim të bimëve narkotike, dhe O. D efektiv policie prej 6 vitesh.
Dy vëllezërit janë akuzuar për kultivim kanabisi, bashkëpunim me njëri-tjetrin dhe ushtrim presionesh ndaj komunitetit.
Sipas denoncuesit, vëllezërit dyshohet se kanë ngritur parcela me kanabis në zonën malore të fshatit Barkanesh në Krujë , ndërsa njëri prej tyre, efektivi O.D, akuzohet se ka përdorur dron për të kontrolluar terrenin dhe për të siguruar mbrojtjen e aktivitetit të paligjshëm.
Denoncuesi pretendon se efektivi ka shfrytëzuar pozicionin e tij në polici, duke shërbyer për 2 vite në Komisariatin e Krujës, për të mbështetur dhe ruajtur parcelat.
Denoncuesi thotë se ai dhe familja e tij janë kërcënuar, madje se vëllezërit u kanë thënë “që do t’u vrisnin bagëtinë” nëse kullosin pranë zonave ku dyshohet se mbillen parcelat e kanabisit.
Sipas kallëzimit, videoja e parcelës është filmuar në muajin gusht dhe i është dërguar Agjencisë së Mbikëqyrjes Policore (AMP). Denoncuesi pretendon se, pavarësisht provave, çështja “është mbyllur” dhe se efektivi O.D ka paguar për të mos u marrë masa”.
Denoncuesi tregon se, duke pasur frikë se Policia e Krujës po mbronte parcelën, ai ka njoftuar Policinë e Tiranës, e cila ka shkuar në vendngjarje dhe ka asgjësuar bimët narkotike.
Megjithatë, sipas tij, “për autorin nuk janë marrë masa”.
Denoncuesi bën apel institucioneve, Prokurorisë, AMP-së dhe Policisë së Shtetit, që të hetojnë rastin, duke pretenduar se “policia ndihmon kriminelët dhe jo qytetarët që denoncojnë krimin”.
