Një qytetar nga Kamza denoncon një ngjarje të rëndë kriminale, e ndodhur në orët e para të mëngjesit të datës 05 qershor 2024, ku biznesi i tij është shkrumbuar nga një akt i qëllimshëm zjarrvënieje.
Sipas denoncimit, rreth orës 03:47, qytetari është njoftuar me telefon nga një i afërm se biznesi i tij i dhënies së makinave me qira, ku ushtronte aktivitetin me 7 automjete, ishte përfshirë nga flakët.
Ai shprehet se ka bërë kallëzim penal në polici, ndërsa nga pamjet e kamerave të sigurisë së biznesit, të cilat janë administruar nga organet ligjzbatuese, shihen qartë dy persona që hedhin lëndë djegëse dhe më pas i vënë zjarrin automjeteve.
Megjithatë, edhe pse kanë kaluar disa muaj nga ngjarja, autorët nuk janë identifikuar dhe as arrestuar, ndërsa dëmi ekonomik i shkaktuar kap vlerën e milionave lekë.
Qytetari thekson se ka bërë dy kërkesa zyrtare pranë prokurorit të çështjes, Albert Kulici, për t’u informuar mbi ecurinë e hetimeve, por sipas tij, prokurori ka refuzuar ta presë në zyrë dhe nuk i ka dhënë asnjë sqarim mbi fazën ku ndodhet hetimi.
“Kam humbur gjithçka. Dëmi është i jashtëzakonshëm dhe ka prova filmike. Megjithatë, nuk kam marrë asnjë përgjigje konkrete dhe as nuk më është dhënë mundësia të informohem për çështjen time,” shprehet qytetari për Maska.al.
Denoncimi ngre pikëpyetje serioze mbi ecurinë e hetimeve, rolin e institucioneve të drejtësisë dhe mungesën e transparencës ndaj qytetarëve që kërkojnë drejtësi.
Maska.al i bën thirrje Prokurorisë dhe institucioneve përgjegjëse të reagojnë, të sqarojnë publikisht ecurinë e kësaj çështjeje dhe të garantojnë që autorët e këtij akti të dalin përpara drejtësisë.
