Një incident i rëndë është regjistruar një ditë më parë në autostradën Tiranë–Durrës, pranë zonës së QTU-së, ku një i ri është rrahur barbarisht nga dy persona.
Pamjet e publikuara në rrjetet sociale tregojnë momentin kur dy persona ndalojnë një automjet dhe nxjerrin me forcë një të ri nga makina, duke e goditur brutalisht para syve të kalimtarëve dhe drejtuesve të tjerë të mjeteve.
Në video shihen edhe efektivë policie pranë vendit të ngjarjes, por deri tani nuk ka pasur një reagim apo njoftim zyrtar lidhur me incidentin.
Joq shkruan se autorë të dhunës dyshohet të jenë djali i Defrim Koldashit (ish-polic i Komisariatit nr.3) Denisi së bashku me shtetasin Kastriot Tusha, i cili sipas të njëjtave burime është punonjës policie në Komisariatin e Vorës dhe babai i tij ka qenë polic burgu.
Sipas banorëve të zonës, konflikti ka nisur pasi i riu kishte kaluar me makinë nëpër Domje, ku autorët thuhet se nuk lejojnë kalimin e personave të tjerë.
