Argita Malltezi (Berisha) tha mbrëmjen e sotme në emisionin “Top Story” se çështja e hetimit të ish-Kryeministrit Sali Berisha dhe arrestimi i Jamarbër Malltezit është e zhveshur totalisht nga materia dhe gjithçka do të zhbëhet shumë shpejt.
Ajo tha se e rëndësishme është që njeriu të ketë një llogaridhënie karshi Zotit dhe karshi ligjit.
“Shqipëria si çdo vend në tranzicion ka pasur probleme me korrupsionin, por në qeverisjen e Edi Ramës kemi një rritje të nivelit të korrupsionit krahasuar me periudhën e mëparshme.
Ku është sot Shqipëria me korrupsionin? Janë proceduar disa nga hallkat e fundit të detyrës. Ministri i Brendshëm u dënua për shpërdorim detyre, pasi kanabizoi të gjithë vendin, doli i lidhur me mafien.
Pëllumb Gjoka u arrestua para 3 muajsh dhe pronat i sekuestrohen pas 3 muajsh, ndërkohë që pronat e Jamarbër Malltezit sekuestrohen brenda 24 orësh”, tha Argita Malltezi.
Lidhur me privatizimin e ish-kompleksit Partizani, Argita Malltezi tha se janë bërë 3 vjet hetime, ndërsa nuk u pyetën asnjëherë dy personat që janë vënë nën hetim, Sali Berisha dhe Jamarbër Malltezi.
“E dini ju pse nuk janë marrë në pyetje? Sepse nuk kanë dashur që sqarimet apo dëshmitë e tyre të ishin atje në dosje, lidhur me procedurat dhe situatat. SPAK dhe GJKKO po përdoren si kamzhik në duart e Edi Ramës”, tha Argita Malltezi (Berisha).
Ajo tha se gjykatësja e GJKKO vendosi masat e kufizimit të lirisë pa dëgjuar asnjë argument të mbrojtjes. “Hera e parë në 30 vjet që shkelet Kushtetuta, pasi i kufizohet liria një deputeti pa marrë autorizimin nga Parlamenti”, tha Argita Malltezi.
Ajo tha se një dokument i 1946 tregon se këta ishin pronarë, pra nuk kishte si të ishin shpronësuar në 1940, sikundër pretendonte Taulant Balla me dokumentet që nxorri të kohës së Jakomonit, lidhur me pronën te ish-kompleksi Partizani.
“Ne nuk kemi marrë kurrë zyrtarisht ndonjë kallzim të Taulant Ballës , sikundër kurrë nuk morëm dosjen lidhur me arrestimin e Jamarbrit. Ai është në burg, dosjen s’na i japin. Nuk kemi asnjë problem me hetimin”, tha Argita Malltezi, duke theksuar se ky ishte një sulm politik. AJo akuzoi SPAK për mashtrim kur akuzon Malltezin se u bë pronar i madh kur kishte vetëm 113 metra.
