Teksa lufta e konfliktet kanë shpërthyer në të katër anët e botës, qytetarë të ndryshëm tentojnë që të bëjnë aq sa kanë në dorë, kundër gjakderdhjes së të pafajshëmve. Një i tillë është edhe Mubarak Ahmad, i cili i gjendur përballë vrasjes së të pafajshëmve, ka zgjedhur që të marrë makinën e tij, ta mbushë me mesazhin e paqes e dashurisë, për ta përhapur atë në të gjithë vendet e botës.
Turin e tij rrotull botës e ka nisur më 14 gusht nga Britania e Madhe, deri më tani e ka përcjellë këtë mesazh në 22 shtete të botës, e këto 2 ditë, radhën e kishte Shqipëria. “Bota sot është e privuar nga drejtësia. Edhe superfuqitë që pretendojnë të vendosin paqe, luftojnë për synimet e tyre shpesh jo të drejta. Për këtë arsye, gjithë jemi dëshmitarë të faktit që luftëra vetëm se po shtohen.
Mungesa e drejtësisë ka ardhur edhe për faktin se njerëzimi në përgjithësi po i largohet çdo ditë e më shumë nga Krijuesi i tij, pra nga Zoti i tij. Për këtë arsye, njerëzit po bëhen egoistë gjithnjë e më shumë. Ky është mesazhi që prej më shumë se 10 vjetësh prijësi im Hazret Mirza Masrur Ahmedi po i jep gjithë botës. Duke iu bashkuar nismës së tij, kam filluar këtë rrugëtim për të udhëtuar botën me mesazhin e paqes. Unë quhem Mubarak Ahmad. Jam nga Britania e Madhe.
Kam filluar udhëtimin më 14 gusht 2023. Pra, në Shqipëri kam mbërritur në pas 3 muaj udhëtimi. Deri më tani, kam udhëtuar në 22 shtete. Mesazhi im është “Dashuri për të gjithë, urrejtje për askënd”.”, thotë Ahmad. Një njeri i thjeshtë që ka punuar në kompani të ndryshme transporti në Angli, Ahmad shprehet se nismën e ka marrë me vetëfinancim dhe pak mbështetje nga familja.
Por kjo nismë ka gjetur pëqafues të saj në çdo vend, të cilët i kanë mundësuar në vende të ndryshme dikush karburantin e dikush të holla për ushqim e fjetje, duke mundësuar vijim e kësaj thirrje. Kur muslimanët përballen me paragjykime për terrorizëm e ekstremizëm, Mubarak Ahmad, ka zgjedhur të përçojë mesazhin që islami i vërtetë proklamon fuqishëm: Dashuri për të gjithë, urrejtje për askënd!
