Autoriteti Kombëtar i Ushqimit ka njoftuar konsumatorët për një alarm të sigurisë ushqimore lidhur me një lot të sallamit “Galbanetto”, pas një njoftimi të sistemit europian RASFF për praninë e një trupi të huaj në produkt.
Bëhet fjalë për produktin “SALAME GALBANETTO G230 c.a”, me lot L.264173 dhe datë skadence 23 tetor 2026.
Sipas njoftimit të AKU-së, rasti është raportuar nga autoritetet italiane dhe është klasifikuar me nivel serioz risku për shëndetin.
Të dhënat e produktit të përfshirë në alarm janë:
Emri: SALAME GALBANETTO G230 c.a
LOT: L.264173
Data e skadencës: 23/10/2026
Numri i referencës: 12364615
Referenca RASFF: 2026.7652
Kategoria: Mish dhe nënprodukte
Shteti njoftues: Itali
Niveli i riskut: Serioz
Paketues/eksportues: Conad
Importues: Conad Albania
AKU u ka bërë thirrje konsumatorëve që, nëse e kanë këtë produkt në posedim, të mos e konsumojnë dhe ta kthejnë pranë pikës së shitjes ku është blerë.
Autoriteti u kërkon qytetarëve të kontrollojnë veçanërisht numrin e lotit dhe datën e skadencës, për të verifikuar nëse produkti që kanë në shtëpi përfshihet në njoftimin e sigurisë ushqimore.
Reagon Conad Albania
Pas publikimit të njoftimit nga AKU, ka reaguar edhe Conad Albania, e cila ka dhënë versionin e saj për produktin dhe lotin e përfshirë në alarm.
Në një sqarim zyrtar të publikuar më 9 shtator, kompania thotë se e kishte marrë njoftimin për lotin L.264173 që më 31 gusht 2026.
Sipas Conad Albania, menjëherë pas marrjes së informacionit, produkti i prekur, një karton me 16 copë, u identifikua dhe u izolua përpara se të vendosej në raftet për shitje.
“Ky produkt nuk është shitur në asnjë pikë të shitjes Conad Albania dhe nuk ka arritur te konsumatorët”, sqaron kompania.
Conad Albania thotë se më 8 shtator, pas publikimit të njoftimit nga AKU, kreu verifikimet përkatëse dhe konfirmoi se produkti nuk kishte dalë në treg, nuk ishte shpërndarë dhe nuk ishte vendosur për shitje në pikat e saj.
Megjithatë, kompania pretendon se ky informacion i dalë nga verifikimi nuk është pasqyruar në njoftimin publik të AKU-së.
Kompania thekson gjithashtu angazhimin e saj për transparencë, siguri ushqimore dhe informim të saktë të konsumatorëve, ndërsa deklaron se vijon bashkëpunimin me autoritetet kompetente dhe partnerët e rrjetit Conad.
Në fund, Conad Albania u kërkon mediave që kanë publikuar apo shpërndarë lajmin të korrigjojnë informacionet që i konsideron të pasakta ose të paplota dhe të pasqyrojnë faktet e mësipërme.
