Rasti “Duamena” është një ngjarje që ndodh për herë të parë në vendin tonë dhe kjo shtyn protagonistët të kenë mangësi në mënyrën se si e përballojnë dhe se si sillen pas një precedenti të tillë. Vetë drejtori i Partizanit, Olsi Rama, me të drejtë në konferencën për mediat pas ndeshjes, u shpreh se duhej luajtur në një moment tjetër, por do të ishte e udhës që ky konstatim të ishte adresuar si kërkesë para ndeshjes.
Ndërkohë, FSHF-ja, nga ana e saj, nuk ka menduar në aspektin moral dhe njerëzor se si shokët e të ndjerit, por edhe kundërshtarët, do të ndiheshin në momentin që do të rinisnin sërish aty ku kishte ndodhur gjithë tragjedia. Një ndeshje në mes me siguri do të ndryshonte gjendjen emocionale dhe do t’i fuste ata djem më shpejt në ritmin e jetës dhe vetë futbollit. Gjithashtu, Federata dhe Ministria e Sportit nuk kanë bërë asnjë ndërhyrje për të parë se si përjetohet kjo fatkeqësi dhe nëse duhet ndërhyrja e ndonjë eksperti të fushës, siç është psikologu.
Në lidhje me këtë çështje as klubet nuk kanë lëvizur, pasi burime për gazetën bëjnë me dije se nuk është kontaktuar psikologu nga asnjëri prej klubeve, por janë mjaftuar me punën e stafeve teknike. Dje lojtarëve me siguri u janë kthyer kujtimet e vështira dhe të freskëta të ngjarjes tragjike dhe futbolli ka kaluar sërish në plan të dytë në mendimet e tyre.
