Një 32-vjeçar është vënë në pranga në Gjirokastër, pasi u kap duke transportuar kundrejt pagesës një emigrant nga Afganistani, i cili kishte kaluar ilegalisht kufirin greko-shqiptar.
Gjatë operacionit policor të koduar “Zona 3”, uniformat blu zbuluan se drejtuesi i automjetit kishte shkelur edhe masën e sigurisë “Arrest në shtëpi”, të caktuar më herët nga Gjykata e Tiranës.
Në pranga përfundoi shtetasi me inicialet K. B., 32 vjeç, banues në Tiranë. Ndërkohë, pasagjeri M. Gj., 27 vjeç, u procedua penalisht për moskallëzim krimi dhe mallra kontrabandë.
Automjeti tip “Renault”, me të cilin udhëtonin dy të rinjtë, u ndalua në aksin rrugor Sarandë–Gjirokastër, pranë Urës së Kardhiqit. Sipas policisë, ata po transportonin kundrejt pagesës një shtetas afgan, i cili kishte hyrë në mënyrë të paligjshme në Shqipëri nga Greqia.
Nga verifikimet e kryera rezultoi se 32-vjeçari kishte thyer masën e sigurisë “Arrest në shtëpi”, të vendosur për veprat penale “Largimi i të burgosurit nga vendi i qëndrimit” dhe “Shkatërrimi i pronës me zjarr”.
Gjatë kontrollit të automjetit, policia gjeti edhe dy çanta me veshje të ndryshme, të dyshuara si mallra kontrabandë dhe që i përkisnin pasagjerit.
Në cilësinë e provës materiale u sekuestruan automjeti, dy çantat me veshje dhe dy telefona celularë.
Operacioni u zhvillua nga Drejtoria Vendore e Policisë Gjirokastër, në bashkëpunim me strukturat e hetimit të trafiqeve të paligjshme, krimeve ekonomiko-financiare dhe Policinë Rrugore.
Materialet procedurale iu referuan Prokurorisë për veprime të mëtejshme.
