Një ngjarje e rëndë ka ndryshuar papritur jetën e Eneas, i cili më 23 shtator pësoi një dëmtim të rëndë të palcës kurrizore gjatë një udhëtimi në Brazil.
Sipas familjarëve, dëmtimi ka bërë që Enea të mbetet i paralizuar nga gjoksi e poshtë. Aktualisht ai ndodhet në kujdes intensiv në një spital në Brazil, ndërsa familja po përgatitet për transportimin e tij drejt Nju Jorkut, ku pritet të vijojë trajtimin dhe një proces të gjatë rehabilitimi.
Lajmi ka tronditur të afërmit e tij, të cilët e përshkruajnë Enean dhe të fejuarën e tij, Michelle, si një çift të ri, aktiv dhe shumë të lidhur me njëri-tjetrin.
“E ardhmja është shumë e pasigurt tani”, shkruan familja në thirrjen për ndihmë të publikuar në GoFundMe, duke theksuar se përveç sfidës së madhe shëndetësore, familja përballet edhe me shpenzime të konsiderueshme për trajtimin, transportin dhe rehabilitimin.
Për këtë arsye është hapur një fushatë donacionesh me një objektiv prej 50 mijë dollarësh. Deri në momentin e publikimit, fushata kishte mbledhur rreth 20,854 dollarë, ose 42% të shumës së synuar.
Familjarët u bëjnë thirrje qytetarëve që, nëse kanë mundësi, të kontribuojnë ose të shpërndajnë fushatën, në mënyrë që Enea të ketë mundësinë të marrë kujdesin dhe trajtimin e nevojshëm.
“Ju lutem mbani në mendje atë, motrën time dhe familjen e tij”, shkruan familja, duke falënderuar të gjithë ata që kanë ofruar mbështetje në këtë periudhë të vështirë.
