Bledar Çafi, 50 vjeç, është një emër i njohur prej vitesh në kronikën e zezë të Shkodrës. I cilësuar në raportimet mediatike si “i forti” i qytetit verior, Çafi u arrestua mëngjesin e 26 shtatorit gjatë operacionit “Muri i Lartë”, të zhvilluar nga Policia e Shtetit, BKH dhe SPAK.
Ndaj tij, GJKKO kishte caktuar një ditë më herët masën “arrest me burg”, në kuadër të një hetimi për trafikim të lëndëve narkotike dhe veprimtari të dyshuar të një grupi të strukturuar kriminal.
Arrestimi i fundit dhe akuzat e SPAK
Çafi u kap në banesën e tij në Shkodër, në orët e para të mëngjesit. Sipas Policisë, ai dyshohet për “Trafikim të lëndëve narkotike”, kryer në bashkëpunim në formën e grupit të strukturuar kriminal, si dhe për veprat që lidhen me aktivitetin e organizatave kriminale.
Operacioni u zhvillua në Shkodër dhe Tiranë, me pjesëmarrjen e RENEA-s, Forcës së Posaçme Operacionale, strukturave të hetimit të narkotikëve, DVP Shkodër dhe BKH-së, nën drejtimin e SPAK.
Në të njëjtën dosje është caktuar masë “arrest me burg” edhe për Endrit alias Indrit Doklen, 43 vjeç, i cili nuk u gjet në banesë gjatë kontrolleve dhe vijon të jetë në kërkim.
I dënuar në Itali për trafik droge
Emri i Bledar Çafit është shfaqur më herët edhe në procedura penale në Itali.
Më datë 4 qershor të 2020, Gjykata e Triestes në Itali e dënoi Cafin me 4 vite dhe 2 muaj burg për trafik droge në sasi të mëdha
“Kapet dhe arrestohet me qëllim ekstradimi drejt Italisë, 41-vjeçari i dënuar për veprat penale ‘Pjesmarrje në grup të strukturuar kriminal’ dhe ‘Trafikim droge në sasi të mëdha’. Në vijim të punës për kapjen e personave në kërkim ndërkombëtar, në bazë të informacioneve të siguruara në rrugë operative, nga strukturat e DVP Shkodër u kap dhe u ndalua me qëllim ekstradimi drejt Italisë, shtetasi Bledar Cafi, 41 vjeç, banues në Shkodër, i shpallur në kërkim ndërkombëtar nga Zyra Qendrore e Interpol Tirana” – njofton policia.
Emri i Çafit në hetimet për pasuritë
Bledar Çafi dhe vëllai i tij, Gëzim Çafi, kanë qenë më herët objekt i Operacionit Forca e Ligjit, në kuadër të procedurave për justifikimin e pasurive.
Raportime të publikuara në atë periudhë, duke iu referuar një raporti të Policisë së Shtetit, kanë bërë fjalë për disa aktivitete biznesi të lidhura me familjen Çafi në Shkodër.
Mes tyre është përmendur një bar-kafe, një aktivitet në fushën e peshkimit në lumin Buna dhe një njësi tregtare me shumicë dhe pakicë në lagjen “Salo Halili”, e regjistruar në vitin 2018.
Çfarë po heton SPAK?
Arrestimi i sotëm është pjesë e një hetimi të ri të SPAK, i cili çoi në caktimin e masave të sigurisë nga GJKKO më 25 shtator.
Sipas Policisë, Çafi dyshohet se ka qenë pjesë e një veprimtarie të lidhur me trafikimin e narkotikëve dhe një grup të strukturuar kriminal.
