Është hedhur shorti në Gjykatën Administrative të Apelit për ankimin e kryetarit të Bashkisë së Tiranës, Erion Veliaj, ndaj vendimit të Gjykatës Administrative të Shkallës së Parë lidhur me emërimin e Ols Dados në detyrën e prokurorit.
Çështja i ka rënë për shqyrtim gjyqtares Blerona Hasa.
Veliaj ka kundërshtuar mënyrën e emërimit të Ols Dados si prokuror, duke kërkuar rrëzimin e aktit përkatës. Më herët, Gjykata Administrative e Shkallës së Parë nuk e pranoi padinë e tij, duke argumentuar se kryebashkiaku nuk kishte interes të drejtpërdrejtë ligjor në këtë çështje, por vetëm interes të tërthortë.
Kryebashkiaku nga ana tjetër shprehet se ai është zgjedhur demokratikisht nga rreth 160 mijë qytetarë të Tiranës dhe i është nënshtruar pushtetit penal duke qëndruar në paraburgim prej 18 muajsh pa vendim gjykate fajësie dhe po gjykohet për dyshimet e ngritura ndaj tij.
Atëherë, ai ngre pyetjen se pse prokurori që ka ushtruar këtë pushtet penal duhet të mbetet jashtë kontrollit të një gjykate dhe të verifikohet nëse është emëruar sipas ligjit.
