Një 33-vjeçar i shpallur në kërkim ndërkombëtar nga autoritetet italiane është lokalizuar dhe arrestuar në Ndroq, pas bashkëpunimit mes strukturave të Policisë shqiptare dhe homologëve në Itali.
Në kuadër të operacionit “Fast”, specialistët e Sektorit për Kërkimin (FAST Albania), në bashkëpunim me shërbimet e Drejtorisë Vendore të Policisë Tiranë dhe nëpërmjet Interpol Tiranës, kanë bërë të mundur kapjen e shtetasit D. H., banues në Tiranë.
33-vjeçari ishte shpallur në kërkim ndërkombëtar nga Interpol Roma, pasi ndaj tij autoritetet gjyqësore italiane kishin caktuar masën e sigurisë “Arrest në burg”, më 31 korrik 2026.
Ai dyshohet se është përfshirë në disa vepra penale të rënda, mes tyre vrasje e mbetur në tentativë, plagosje, shkatërrim prone, kundërshtim të arrestimit dhe kundërshtim të punonjësit të Policisë gjatë ushtrimit të detyrës.
Pas lokalizimit në territorin shqiptar, D. H. u arrestua provizorisht me qëllim vijimin e procedurave ligjore.
Ndërkohë, Interpol Tirana, në bashkëpunim me Interpol Romën, ka nisur procedurat për ekstradimin e 33-vjeçarit drejt Italisë, ku do të përballet me autoritetet gjyqësore.
