Asociacioni i Gazetarëve të Shqipërisë ka publikuar raportin e monitorimit për periudhën janar-qershor 2026, duke ngritur shqetësimin për sigurinë e gazetarëve dhe klimën në të cilën ushtrohet profesioni i medias në vend.
Gjatë gjashtë muajve të parë të vitit, organizata ka evidentuar 31 raste konkrete që lidhen me cenimin e lirisë së medias, ndërsa në dokument janë përfshirë 42 reagime dhe publikime të AGSH. Në këto raste janë identifikuar 23 profesionistë të medias.
Sipas të dhënave të raportit, në tetë raste incidentet kanë përfshirë dhunë fizike, rrezikim të drejtpërdrejtë ose dëmtim të pronës. Ndërkohë, në nëntë raste kanë qenë të përfshira gazetare apo gra në drejtimin e mediave.
Protestat rezultojnë ndër situatat ku gazetarët janë përballur me rrezikun më të madh. Raporti përmend disa episode gjatë muajve janar, shkurt, maj dhe qershor, ku gazetarët dhe operatorët janë penguar, kërcënuar apo sulmuar gjatë raportimit.
Në këto incidente janë përfshirë si forcat e policisë, përmes përdorimit të gazit lotsjellës dhe ujit me presion, ashtu edhe protestues apo persona të tjerë që kanë ndërhyrë në punën e ekipeve mediatike.
AGSH vëren gjithashtu një lidhje mes gjuhës denigruese ndaj gazetarëve dhe rritjes së presionit ndaj tyre. Sipas organizatës, sulmet verbale dhe etiketimet publike krijojnë një klimë ku pengimi apo agresioni ndaj gazetarëve mund të normalizohet.
Në raport, politikanët dhe zyrtarët publikë renditen ndër kategoritë më të shpeshta të aktorëve të lidhur me presionet ndaj medias. Një tjetër shqetësim i ngritur është mënyra e re e komunikimit të Policisë së Shtetit, për të cilën AGSH thotë se ka sjellë vonesa dhe kufizime në marrjen e informacionit për ngjarje të rëndësishme.
Organizata ndalet veçanërisht te rastet që kanë prekur gazetaret. Sipas raportit, tetë gra janë identifikuar në raste individuale, ndërsa një tjetër episod lidhet me sulm me përmbajtje seksiste ndaj një grupi gazetare.
AGSH argumenton se sulmet me bazë gjinore shpesh zhvendosin vëmendjen nga puna dhe përmbajtja e raportimit drejt jetës private, pamjes apo karakteristikave personale të gazetares.
Në përfundim, organizata u kërkon institucioneve që të bëjnë publike ecurinë e hetimeve për rastet e sulmeve dhe kërcënimeve ndaj gazetarëve, si dhe të garantojnë masa më të qarta sigurie gjatë protestave.
Gjithashtu, kërkohet akses i barabartë i medias në informacion dhe konferenca, ndërsa partive politike dhe zyrtarëve publikë u bëhet thirrje që kritikën ndaj raportimeve ta adresojnë përmes fakteve dhe mjeteve ligjore, pa sulme personale apo kufizime ndaj gazetarëve.
