Në vitin 2026, në vend që një qytetar të marrë një përgjigje për ujin e pijshëm që i mungon në shtëpi, duket se duhet fillimisht të kujdeset edhe për mënyrën se si i drejtohet kryebashkiakut.
Një koment i publikuar në rrjetet sociale ka sjellë një përplasje të pazakontë mes një qytetari dhe kryetarit të Bashkisë Shijak, Elton Arbana.
Qytetari, në një prej postimeve të kryebashkiakut, i ka kërkuar një gjë që, në një shoqëri normale, nuk do duhej të ishte aspak e pazakontë:
“Na sill ujin te shtëpia, se po lahemi me kazan.”
Në vend të një përgjigjeje për problemin e furnizimit me ujë, qytetari mori këtë reagim nga kryebashkiaku:
“Flit mirë o miko, se s’je duke fol me ato që je mësuar.”
Dhe sikur kjo të mos mjaftonte, Arbana vijon:
“Ah, s’ke faj ti mor xhaxh, se e di unë ç’a do ti.”
Pra, qytetari kërkon ujë, ndërsa përgjigjja që merr është një leksion mbi mënyrën se si duhet t’i flasë kryebashkiakut.
Kaq sa për ta kuptuar prioritetin: uji mund të presë, por protokolli i komunikimit me kryebashkiakun jo.
Nëse banorët kanë probleme me furnizimin me ujë, pyetja më e rëndësishme do të ishte kur do të zgjidhet problemi dhe pse qytetarët detyrohen të lahen me kazan. Por në këtë rast, debati duket se mori një drejtim tjetër: nga uji te “fol mirë o miko”.
Në rrjetet sociale, mënyra e komunikimit të kryebashkiakut ka ngjallur reagime, pasi qytetari nuk po kërkonte ndonjë privilegj personal, por po ngrinte një shqetësim që lidhet me një nevojë bazike: të ketë ujë në shtëpi.
Dhe këtu vjen ironia e gjithë historisë: nëse në Shijak mungon uji, të paktën duket se nuk mungojnë përgjigjet e forta në Facebook.
Kryebashkiaku “gangster” i Shijakut mund të ketë zgjedhur stilin e vet të komunikimit, por qytetarët ndoshta do të preferonin diçka shumë më të thjeshtë: ujë nga rubineti, jo replika në komente.
Sepse në fund të fundit, një qytetar mund të ketë gabuar në mënyrën se si e ka shkruar komentin, por kjo nuk e ndryshon pyetjen thelbësore:
Pse në vitin 2026 ka ende banorë që ankohen se nuk kanë ujë të pijshëm në shtëpi dhe detyrohen të lahen me kazan?/Joq
