Detaje të reja kanë dalë nga vrasja e turistit portugez Luis Miguel Varela Mendes, ngjarje e ndodhur një ditë më parë në Ksamil.
Sipas hetimeve, dyshohet se sherri ka nisur fillimisht mes 20-vjeçarit dhe shtetasit David Heurtevent, një shqiptaro-britanik nga Vora. Të dy janë përplasur fizikisht me njëri-tjetrin dhe në këtë moment ka ndërhyrë Sokrat Vata, autori i dyshuar i vrasjes.
Në dëshminë e tij, Vata është shprehur se iu ka kërkuar turistëve të mbajnë qetësi, pasi në lokal kishte klientë të tjerë. Por, situata nuk është qetësuar dhe në këtë moment dëshmon se ka nisur përplasja fizike.
Sipas tij, thika me të cilën është kryer krimi i përket protugezit, duke deklaruar se e ka parë mjetin prerës në duart e viktimës.
Për të vijuar te dinamika e ngjarjes e zbardhur nga autoritetet, pas goditjeve të para mes Heurtevent dhe turistit portugez, në sherr janë përfshirë edhe disa pjesëtarë të stafit të lokalit, të cilët dyshohet se kanë goditur 20-vjeçarin.
Situata ka agravuar dhe sipas policisë, Sokrat Vata dyshohet se ka ndërhyrë në konflikt dhe e ka goditur disa herë me thikë turistin portugez.
Sokrat Vata, i dyshuar si autori i goditjeve me thikë, është vënë në pranga, ndërsa David Heurtevent është shpallur në kërkim. Të dy dyshohen për veprën penale “Vrasje me dashje”, kryer në bashkëpunim.
Shokët e viktimës kanë deklaruar se nuk e kanë parë momentin kur 20-vjeçari portugez është goditur me thikë dhe kanë treguar se janë përballur me policinë në mëngjes. Në po të njëjtën kohë, dëshmojnë se pranë bregut të detit, kanë parë trupin e pajetë të shokut të tyre.
