Gjykata e Tiranës ka vendosur të lërë në burg Ylli Zallën, i arrestuar dy ditë më parë gjatë një operacioni policor ku iu gjetën armë, municione, mjete shpërthyese dhe lëndë narkotike.
Masa e sigurisë “arrest në burg” u kundërshtua nga mbrojtja, e cila kërkoi një masë më të butë, duke argumentuar se Zalla nuk paraqet rrezikshmëri të lartë shoqërore.
Në seancë, avokati është përpjekur të rrëzojë disa nga pretendimet që lidhen me materialet e sekuestruara. Sipas tij, armët nuk ishin të reja dhe bëhej fjalë për mjete të prodhimit kinez, të viteve ’80.
Mbrojtja ka vënë në pikëpyetje edhe rrezikshmërinë e materialeve shpërthyese. Avokati ka deklaruar se disa nga kapsollat detonatore nuk funksiononin, ndërsa mjetet e tjera të sekuestruara nuk ishin montuar në një mënyrë që do të mundësonte shpërthimin e tyre.
Një tjetër argument i paraqitur para gjykatës lidhet me vendin ku u gjetën materialet. Sipas mbrojtjes, armët dhe municionet ishin lënë në pjesën e pasme të banesës, mes ferrave, pa ndonjë sistem të posaçëm për ruajtjen apo paketimin e tyre.
